കോട്ടയം: കൊട്ടാരക്കര താലൂക്കാശുപത്രിയില് ഡ്യൂട്ടിക്കിടെ അക്രമിയുടെ കുത്തേറ്റു മരിച്ച ഡോ. വന്ദന ദാസിന്റെ ഓര്മ്മയ്ക്കായി ജന്മനാടായ കടുത്തുരുത്തിയിലും ആശുപത്രി ഉയരുന്നു. കടുത്തുരുത്തി മധുരവേലിയില് ഡോ. വന്ദന ദാസ് മെമ്മോറിയല് ആശുപത്രി അടുത്ത മാസം തുറക്കുമെന്ന് മാതാപിതാക്കളായ നമ്പിച്ചിറക്കാലായില് കെ.ജി.മോഹന്ദാസും വസന്തകുമാരിയും പറഞ്ഞു. വസന്തകുമാരിയുടെ ജന്മനാടായ ആലപ്പുഴ തൃക്കുന്നപ്പുഴയില് ഡോ. വന്ദനയുടെ പേരില് നിലവില് ഒരു ആശുപത്രിയുണ്ട്. കുറുപ്പന്തറയില്തന്നെ കിടത്തിച്ചികിത്സാ സൗകര്യമുള്ള മറ്റൊരു ആശുപത്രി കൂടി നിര്മിക്കാനും പദ്ധതിയുണ്ടെന്നും ഇതിനായി വന്ദനയുടെ പേരില് ചാരിറ്റബിള് ട്രസ്റ്റിന്റെ പ്രവര്ത്തനം ആരംഭിച്ചതായും ഇരുവരും അറിയിച്ചു. ഇവരുടെ സ്വത്തുക്കള് ട്രസ്റ്റിനു കൈമാറും. വിദ്യാര്ഥികള്ക്ക് പഠനസഹായവും ട്രസ്റ്റ് നടപ്പാക്കും. ബിഹാര് ഗവര്ണര് ആരിഫ് മുഹമ്മദ് ഖാന്, കേന്ദ്രമന്ത്രി സുരേഷ് ഗോപി അടക്കമുള്ളവരുടെ പിന്തുണയോടെയാണു ട്രസ്റ്റിന്റെ പ്രവര്ത്തനമെന്നും മോഹന്ദാസ് അറിയിച്ചു.
2023 മേയ് 10ന് ആണ് അക്രമിയുടെ കുത്തേറ്റു ഡോ. വന്ദന ദാസ് മരിച്ചത്.
