ആലപ്പുഴ: ചേര്ത്തല കുത്തിയതോട് റോഡരികില് കളിമണ് മോഡലിംഗിനായി കളിമണ്ണ് തയാറാക്കി നില്ക്കുകയായിരുന്ന യുവതിയെ കയറി പിടിച്ച യുവാക്കള് പിടിയില്. പട്ടണക്കാട് പുത്തന്മാളിക കാജുമന്സിലില് സിയാദ് (39), തുറവൂര് കൊച്ചുതറയില് വിഷ്ണു എന്നിവരെയാണ് പിടികൂടിയത്.
യുവതിയെ കയറി പിടിച്ച ശേഷം ബൈക്കില് കടന്ന ഇവര് ഒളിവില് പോയിരുന്നു.
പ്രതികളെ കുത്തിയതോട് പൊലീസാണ് പിടികൂടിയത്.കുത്തിയോട് തൈയ്ക്കാട്ടുശേരി ഫെറി റോഡിലാണ് സംഭവം ഉണ്ടായത്. വീടിന് സമീപത്തെ റോഡരികില് കളിമണ്ണ് കലക്കി നില്ക്കുന്നതിനിടെ യുവതിയുടെ അടുത്തേക്ക് രണ്ടു പേര് ബൈക്കിലെത്തി.കുറച്ചു ദൂരം മുന്നോട്ടുപോയശേഷം യുവതിയുടെ അടുത്തേക്ക് തിരിച്ചുവന്നു.
തുടര്ന്ന് ബൈക്കിന് പിന്നിലിരുന്ന യുവാവ് ഇറങ്ങി യുവതിയോട് ആരുടേയോ വീട്ടിലേക്ക് വഴി ചോദിച്ചതിനുശേഷം പെട്ടെന്ന് യുവതിയുടെ ശരീരത്തില് പിടിക്കുകയായിരുന്നു.യുവതിയുടെ നിലവിളി കേട്ടെത്തിയ മാതാപിതാക്കളെ കണ്ട് പ്രതികള് ബൈക്കില് കടന്നുകളഞ്ഞു. യുവതിയും മാതാപിതാക്കളും പരാതി നല്കിയതിനെ തുടര്ന്ന് പൊലീസ് അന്വേഷണം ആരംഭിച്ചു. തുടര്ന്ന് പ്രതികളെ കസ്റ്റഡിയിലെടുത്ത് , യുവതിക്കുനേരെ ലൈംഗികാതിക്രമം നടത്തിയതിന് കേസെടുത്തു.
