തിരുവനന്തപുരം: അരുവിക്കര എല് പി എസില് ഹാജര് രേഖപ്പെടുത്തി പോകാനൊരുങ്ങിയ അധ്യാപകരെ സമരാനുകൂലികള് പൂട്ടിയിട്ടു. ആറ് അദ്ധ്യാപകരെ സ്കൂള് വളപ്പിനകത്താക്കി ഗേറ്റ് പുറത്ത് നിന്നും പൂട്ടി.
ഹാജര് രേഖപ്പെടുത്തി പോകാന് അനുവദിക്കില്ലെന്നും മൂന്നര വരെ സ്കൂളില് തന്നെ തുടരണമെന്നുമുളള നിലപാടിലായിരുന്നു സമരാനുകൂലികള്.സ്കൂളിന്റെ ഓഫീസ് പൂട്ട് സമരക്കാര് എടുത്ത് കൊണ്ടുപോയി. വൈകിട്ട് സ്കൂള് തുറന്ന് കൊടുക്കും എന്നറിയിച്ചെങ്കിലും സമരാനുകൂലികള് തുറന്ന് നല്കുന്നില്ലെന്ന് സ്കൂള് അധികൃതര് പരാതി നല്കിയതിനെ തുടര്ന്ന് അരുവിക്കര സി.ഐ യുടെ നേതൃത്വത്തില് പൂട്ട് തല്ലി തകര്ത്തു.
അരുവിക്കര ഹയര് സെക്കന്ററി സ്കൂളിലും സമരാനുകൂലികള് ഗേറ്റ് പുറത്ത് നിന്നും പൂട്ടി. പത്ത് വനിതാ അദ്ധ്യാപകരും ഒരു പുരുഷ അദ്ധ്യാപകനും സ്കൂളില് ഉണ്ടായിരുന്നു. വൈകുന്നേരം 4.20 ന് സംഘടനാ നേതാക്കള് എത്തിയാണ് ഗേറ്റ് തുറന്നത്.
അതിനിടെ, കൊല്ലത്തും പണിമുടക്ക് ദിവസം സര്ക്കാര് സ്കൂളില് ഒപ്പിട്ട ശേഷം അധ്യാപകര് പോയി. അഞ്ചല് കരുകോണ് ഗവ.ഹയര് സെക്കന്ഡറി സ്കൂളിലെ അധ്യാപകരാണ് സ്കൂളിലെത്തി ഒപ്പിട്ട ശേഷം വീടുകളിലേക്ക് മടങ്ങിയത്. സമരക്കാര് സ്കൂളിലെത്തി ഹാജര് ബുക്ക് പരിശോധിച്ചപ്പോള് 12 പേര് ഒപ്പിട്ടതായി വ്യക്തമായി.എസ്എംസി ചെയര്മാന്റെ നേതൃത്വത്തിലായിരുന്നു പരിശോധന. പ്രിന്സിപ്പാളിന്റെ അനുമതിയോടെയാണ് ഹാജര് ബുക്ക് പരിശോധിച്ചതെന്ന് സമരക്കാര് പറഞ്ഞു. സ്കൂളില് നിന്നും പ്രതിഷേധക്കാരെ പൊലീസ് എത്തിയാണ് പിന്തിരിപ്പിച്ചത്.
