കോഴിക്കോട് :തൊണ്ടയാട് ബൈപ്പാസില്‍ നെല്ലിക്കോട് മണ്ണിടിഞ്ഞ് അതിഥി തൊഴിലാളി മരിച്ചു. പശ്ചിമബംഗാള്‍ സ്വദേശി എലാഞ്ചര്‍ ആണ് മരിച്ചത്. ഒരു മണിക്കൂര്‍ നേരം പരിശ്രമിച്ചാണ് തൊഴിലാളിയെ പുറത്തെടുത്തത്. മണ്ണിനടിയില്‍ അകപ്പെട്ട രണ്ട് പേരെ രക്ഷപ്പെടുത്തി. ഇവരെ കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.
രക്ഷാപ്രവര്‍ത്തനത്തിനിടയിലും മണ്ണിടിഞ്ഞത് വെല്ലുവിളിയായിരുന്നു. ഞായറാഴ്ച രാവിലെ പതിനൊന്ന് മണിയോടെയാണ് അപകടം. സ്ഥലത്ത് നിര്‍മാണം നടത്തരുതെന്നും മുന്‍പ് സ്ഥലത്ത് മണ്ണിടിച്ചില്‍ ഉണ്ടായിട്ടുണ്ടെന്നും പ്രദേശവാസികള്‍ ആവശ്യപ്പെട്ടെങ്കിലും അത് പാലിക്കപ്പെട്ടില്ല. അപകട സാധ്യത ചൂണ്ടിക്കാട്ടി ജില്ലാ കളക്ടര്‍ക്ക് ഉള്‍പ്പെടെ പരാതി നല്‍കിയിട്ടും, നടപടി ഉണ്ടായില്ലെന്ന് സമീപവാസികള്‍ പറഞ്ഞു. ഫ്ളാറ്റിന്റെ നിര്‍മാണമാണ് പ്രദേശത്ത് നടന്നുകൊണ്ടിരുന്നത്.
വീഴ്ചയുണ്ടായവര്‍ക്കെതിരെ നടപടി ഉണ്ടാകുമെന്നും സമീപവാസികളുടെ പരാതി ശ്രദ്ധയില്‍പ്പെട്ടിട്ടില്ലെന്നും അഹമ്മദ് ദേവര്‍കോവില്‍ എം എല്‍ എ. നിലവില്‍ അസ്വാഭാവിക മരണത്തിനാണ് കേസെടുത്തത്. കൂടുതല്‍ കാര്യങ്ങള്‍ അന്വേഷിച്ച ശേഷം മാത്രമാകും മറ്റ് വകുപ്പുകള്‍ കൂടി ചുമത്തുക. മണ്ണിടിച്ചില്‍ ഭീഷണി നേരിടുന്ന കുടുംബങ്ങളെ സ്ഥലത്ത് നിന്ന് മാറ്റി പാര്‍പ്പിക്കാനാണ് ഇപ്പോള്‍ തീരുമാനിച്ചിട്ടുളളത്.
പ്രതികരിക്കാൻ ഇവിടെ എഴുതുക