പത്തനംതിട്ട : ശബരിമല സന്നിധാനത്തും പമ്പയിലും ശക്തമായ മഴ പെയ്യുന്നു. പമ്പാനദിയിലെ ജലനിരപ്പ് ഉയര്ന്ന പശ്ചാത്തലത്തില് ഭക്തര് പമ്പാ നദിയില് ഇറങ്ങുന്നതിനും ത്രിവേണിയില് കുളിക്കുന്നതിനും ജില്ലാ കളക്ടര് താല്ക്കാലിക വിലക്ക് ഏര്പ്പെടുത്തി.
പമ്പ ത്രിവേണിയിലെ വാഹന പാര്ക്കിംഗിനും താത്കാലിക നിയന്ത്രണമുണ്ട്. പമ്പാ- സന്നിധാനം പാതയില് ശക്തമായ മഴ പെയ്യുന്നതിനാല് മലകയറുമ്പോള് ഭക്തര് ജാഗ്രത പുലര്ത്തണം.
സംസ്ഥാനത്ത് അടുത്ത മൂന്ന് ദിവസം കൂടി അതിശക്തമായ മഴ തുടരുമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഞായര്, തിങ്കള് ദിവസങ്ങളില് വടക്കന് കേരളത്തില് അതിതീവ്ര മഴയ്ക്ക് സാധ്യതയെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്.മലപ്പുറം കോഴിക്കോട് വയനാട് കണ്ണൂര് കാസര്ഗോഡ് ജില്ലകളില് ഞായറും തിങ്കളും ചുവപ്പ് ജാഗ്രതയാണ്. തീര മലയോര മേഖലകളില് ജാഗ്രതാ നിര്ദേശമുണ്ട്.
