ടെഹ്റാന് : ഇറാന്റെ ആണവകേന്ദ്രം തകര്ക്കുകയും നിരവധി ആണവ ശാസ്ത്രജ്ഞന്മാരെ വധിക്കുകയും ചെയ്തുകൊണ്ടുള്ള ഇസ്രയേലിന്റെ ഡ്രോണ്, മിസൈല് ആക്രമണത്തിന് പിന്നില് രണ്ട് മൊസ്സാദ് ഏജന്റുമാരാണ്. ഇസ്രയേലിന്റെ രഹസ്യ ഏജന്സിയായ മൊസ്സാദിന്റെ ഈ രണ്ട് ഏജന്റുമാര് ഇറാന്റെ തലസ്ഥാനമായ ടെഹ്റാനിലെ ഭൂഗര്ഭ അറയില് ഇരുന്ന് ഇറാനെതിരെ മിസൈലുകളും ഡ്രോണുകളും ആക്രമണത്തിനായി ഒരുക്കുന്ന വീഡിയോ ഇസ്രയേല് പുറത്തുവിട്ടു.
44 സെക്കന്റുകള് മാത്രം നീളുന്ന ഹ്രസ്വമായ ഈ വീഡിയോയില് മൂന്ന് ദൃശ്യങ്ങളാണ് ഉള്ളത്. ഒന്നാമത്തേത് രണ്ടു മൊസ്സാദ് ഏജന്റുമാര് ഇറാന്റെ മണ്ണിലെ രഹസ്യകേന്ദ്രത്തില് ആയുധങ്ങള് ആക്രമണത്തിനായി ഒരുക്കുന്നതാണ്. രണ്ടാമത്തേത് ഇവര് വിട്ട മിസൈല് ഇറാന്റെ പ്രതിരോധസംവിധാനത്തിനകത്ത് വന് സ്ഫോടനം നടത്തുന്നതാണ്. മൂന്നാമത്തേത് ഇറാന്റെ ആണവകേന്ദ്രത്തിന് നേരെ മിസൈല് തൊടുക്കാനായി ഇവര് ഒരുക്കുന്നതാണ്.
പക്ഷെ ഇറാന്റെ സകല അഹങ്കാരങ്ങളേയും തകര്ത്തുതരിപ്പണമാക്കുന്നതാണ് ഈ വീഡിയോ. ഇറാനിലേക്ക് ഒളിച്ചുകടത്തിയ ഒരു ട്രക്കിനകത്തും ഇവര് ആയുധങ്ങള് സജ്ജീകരിച്ച് തൊടുത്തിരുന്നു. ഇതിലെ ആയുധങ്ങളും രഹസ്യമായി ടെഹ്റാനിലെവിടെയോ ഒരുക്കിയ ഡ്രോണ് രഹസ്യകേന്ദ്രത്തില് നിന്നുള്ള ഡ്രോണുകളും പ്രധാനമായും ഉപയോഗിച്ചത് ഇറാന്റെ വ്യോമപ്രതിരോധം തകര്ക്കാനായിരുന്നു. പിന്നീടാണ് ഇസ്രയേലിന്റെ 200 യുദ്ധവിമാനങ്ങള് ഇറാനിലെ ആണവകേന്ദ്രങ്ങളില് തലങ്ങും വിലങ്ങും മിസൈല് ആക്രമണങ്ങള് നടത്തിയത്.
ദ ഗാര്ഡിയന് പുറത്തുവിട്ട മൊസ്സാദ് ഏജന്റുമാര് ഇറാനിലിരുന്ന് ആയുധങ്ങള് ആക്രമണത്തിനൊരുക്കുന്ന വീഡിയോ ഫുട്ടേജ്
