ഒരുനാൾ ഒസാമയെ ഒളിപ്പിച്ച ഭീകരരാജ്യം ഇന്ന് യുഎസിന് പ്രിയപ്പെട്ടതായോ ? ഭീകരരെ വളർത്തുന്ന പാകിസ്ഥാനെ പ്രശംസിച്ച് യുഎസ് ജനറൽ 

ന്യൂയോർക്ക് : ഭീകരതയ്‌ക്കെതിരെ എപ്പോഴും ശബ്ദമുയർത്തിയിരുന്ന അമേരിക്ക ഇപ്പോൾ ഭീകരരെ വളർത്തുന്ന രാജ്യമായ പാകിസ്ഥാനെ പ്രശംസിക്കാൻ തുടങ്ങിയിരിക്കുന്നു. യുഎസ് നൽകുന്ന രഹസ്യാന്വേഷണ വിവരങ്ങളുടെ അടിസ്ഥാനത്തിലാണ് പാകിസ്ഥാൻ തീവ്രവാദികൾക്കെതിരെ നടപടിയെടുക്കുന്നതെന്ന് യുഎസ് ഉന്നത സൈനിക ഉദ്യോഗസ്ഥനും യുഎസ് സെൻട്രൽ കമാൻഡിന്റെ (സെൻട്രൽ കമാൻഡ്) കമാൻഡറുമായ ജനറൽ മൈക്കൽ കുരില്ല വിവാദമായ പ്രസ്താവന പുറത്തിറക്കി. ഇന്ത്യയുമായും പാകിസ്ഥാനുമായും അമേരിക്കയുടെ ബന്ധത്തെക്കുറിച്ചും യുഎസ് ജനറൽ സംസാരിച്ചു.

പ്രതിനിധിസഭയുടെ സായുധ സേവന സമിതിക്ക് മുന്നിലാണ് യുഎസ് ജനറൽ മൈക്കൽ കുരില്ല ചൊവ്വാഴ്ച ഇന്ത്യയെയും പാകിസ്ഥാനെയും കുറിച്ച് നിരവധി പ്രസ്താവനകൾ നടത്തിയത്. ഇന്ത്യയുമായും പാകിസ്ഥാനുമായും യുഎസ് ബന്ധം നിലനിർത്തേണ്ടിവരുമെന്ന് യുഎസ് ജനറൽ പറഞ്ഞു. യുഎസിന് ഇന്ത്യയുമായി ബന്ധമുണ്ടെങ്കിൽ പാകിസ്ഥാനുമായും ബന്ധം നിലനിർത്താൻ കഴിയണമെന്ന് അദ്ദേഹം പറഞ്ഞു.

ഭീകരതയ്‌ക്ക് അഭയം നൽകുന്ന രാജ്യമായ പാകിസ്ഥാനെ ഭീകരതയ്‌ക്കെതിരായ തന്റെ പങ്കാളിയായി യുഎസ് ജനറൽ കുരില്ല വിശേഷിപ്പിച്ചതാണ് ഏറെ ആശ്ചര്യപ്പെടുത്തുന്നത്. പാകിസ്ഥാനുമായുള്ള പങ്കാളിത്തത്തിലൂടെ ഐസിസിനെതിരെ(ഖൊറാസാൻ) യുഎസ് നടപടി സ്വീകരിച്ചതായും അതിലെ ഡസൻ കണക്കിന് അംഗങ്ങളെ കൊന്നതായും യുഎസ് ജനറൽ പറഞ്ഞു. യുഎസുമായുള്ള രഹസ്യാന്വേഷണത്തിനായുള്ള ബന്ധത്തിലൂടെ പാകിസ്ഥാൻ ഐസിസ്-കെയുടെ അഞ്ച് ഉന്നത കമാൻഡർമാരെ പിടികൂടിയതായി യുഎസ് അവകാശപ്പെട്ടു.

ഇതിനു പുറമെ പാകിസ്ഥാൻ ആർമി ചീഫ് അസിം മുനീറിനെയും യുഎസ് ജനറൽ കുരില്ല പരാമർശിച്ചു. ഐസിസ്-കെ ഭീകരൻ മുഹമ്മദ് ഷരീഫുള്ളയെ (സഫർ) താൻ പിടികൂടിയതായി അസിം മുനീർ വിളിച്ച് പറഞ്ഞതായി ജനറൽ കുരില്ല പറഞ്ഞു. 2021 ഓഗസ്റ്റ് 26 ന് കാബൂളിലെ വിമാനത്താവളത്തിന് സമീപമുള്ള ബോംബ് സ്‌ഫോടനത്തിൽ ഷരീമുള്ളയ്‌ക്ക് പങ്കുണ്ടെന്ന് കരുതപ്പെടുന്നു. ഈ ഭീകരാക്രമണത്തിൽ യുഎസ് ആർമിയിലെ 13 അംഗങ്ങളും ഏകദേശം 160 സാധാരണക്കാരും കൊല്ലപ്പെട്ടു.

9/11 ആക്രമണത്തിന്റെ സൂത്രധാരൻ ഒസാമ ബിൻ ലാദന് അഭയം നൽകിയ പാകിസ്ഥാൻ ഇന്ന് ഭീകരതയ്‌ക്കെതിരെ അമേരിക്കയെ സഹായിക്കുകയാണെന്ന അമേരിക്കൻ ജനറലിന്റെ വിചിത്രമായ അവകാശവാദം എല്ലാവരെയും അത്ഭുതപ്പെടുത്തിയിരിക്കുകയാണ്.