കൊല്ലം: കൊല്ലം റെയില്‍വേ സ്റ്റേഷന് സമീപമായി നഗരഹൃദയത്തില്‍ തന്നെയുള്ള ഒരു ചെറിയ റെയില്‍വേ സ്റ്റേഷനാണ് കിളികൊല്ലൂര്‍. കൊല്ലം-ചെങ്കോട്ട ദേശീയപാതയില്‍ കരിക്കോട് ജംഗ്ഷനിലുള്ള കിളികൊല്ലൂര്‍ റെയില്‍വേ സ്റ്റേഷന് കൊല്ലം റെയില്‍വേ സ്റ്റേഷന്റെ വികസനത്തിനൊപ്പം തന്നെ കുതിക്കുകയാണ്.
സതേണ്‍ റെയില്‍വേയുടെ ഒഫീഷ്യല്‍ പേജില്‍ ഈയടുത്ത ദിവസങ്ങളിലാണ് കിളികൊല്ലൂര്‍ റെയില്‍വേ സ്റ്റേഷനും സ്ഥാനം പിടിക്കുന്നത്. യാത്രക്കാര്‍ക്ക് നിറമുള്ള കാഴ്ചകള്‍ സമ്മാനിക്കുകയാണ് കിളികൊല്ലൂര്‍ റെയില്‍വേ സ്റ്റേഷന് ചുവരുകളില്‍. അതിമനോഹരമായ രീതിയിലാണ് ഇവിടം പെയിന്റ് ചെയ്തിട്ടുള്ളത്. ഈ വര്‍ണചാരുതയാണ് സതേണ്‍ റെയില്‍വേയുടെ ഒഫീഷ്യല്‍ പേജില്‍ സ്റ്റേഷന് സ്ഥാനം നേടിക്കൊടുകത്തത്.
സ്റ്റേഷന്റെ വികസനപ്രവര്‍ത്തനങ്ങള്‍ പുരോഗമിക്കുന്നതിനിടയില്‍ റിട്ട. സ്റ്റേഷന് മാസ്റ്റര്‍ ആര്‍.സി. ജഗദീശന്‍ ഇക്കഴിഞ്ഞ ഏപ്രിലില്‍, വിരമിക്കുന്നതിന് തൊട്ടുമുന്‍പ് സ്വന്തം ചെലവില്‍ വരപ്പിച്ചതാണ് ഈ ചുവര്‍ചിത്രങ്ങള്‍. ചിത്രകാരനായ മനോജ് വിശ്വനാഥന്റെ കരവിരുതില്‍ പൂര്‍ത്തീകരിച്ച, കേരളത്തിന്റെ തനത് കലാരൂപമായ കഥകളി, ഹംസവും ദമയന്തിയും എന്ന രവിവര്‍മ്മ ചിത്രം, ലാസ്യ നൃത്തകലാരൂപമായ മോഹിനിയാട്ടം, മലയാളി വനിത, കേരളത്തിന്റെ ജലോത്സവമായ വള്ളംകളി, ധീരദേശാഭിമാനി വേലുത്തമ്പി ദളവ, കേരളസിംഹം വീരപഴശ്ശിരാജ, ഇന്ത്യന്‍ സ്വാതന്ത്ര്യസമര ചരിത്രത്തിലെ പ്രൗഢഗംഭീരമായ പോരാട്ടത്തിന് തുടക്കം കുറിച്ച് മഹാത്മാഗാന്ധി നയിച്ച ദണ്ഡിയാത്ര എന്നീ മനോഹര ചിത്രങ്ങളാണ് സ്റ്റേഷന് ചുവരില്‍ യാത്രക്കാരെ വരവേല്‍ക്കുന്നത്. ഇത്തരത്തില്‍ വളരെ മനോഹരമായി രണ്ട് മാസമെടുത്ത് പൂര്‍ത്തീകരിച്ച ഈ ഉദ്യമത്തില്‍, ചിത്രകാരന് എല്ലാ പിന്തുണയും, പ്രോത്സാഹനവും, സഹായവും നല്‍കി സ്റ്റേഷന് സൂപ്രണ്ട് ജഗദീശനൊപ്പം റെയില്‍വേ പോയിന്റ്മാനായ ആര്‍. രഞ്ജുവും പങ്കാളിയായി.
പ്രതികരിക്കാൻ ഇവിടെ എഴുതുക: