തിരുവനന്തപുരം: മണ്‍സൂണ്‍ അടിയന്തര സാഹചര്യം പരിഗണിച്ച് വൈദ്യുതി ലൈനുകളില്‍ വീണു കിടക്കുന്ന മരങ്ങള്‍ വെട്ടിമാറ്റുന്നതിന് കെ.എസ്.ഇ.ബിക്ക് ആവശ്യമായ അടിയന്തര സഹായം ചെയ്യുന്നതിന് നടപടി സ്വീകരിക്കാന്‍ അഗ്‌നിരക്ഷാ വകുപ്പ് ഉദ്യോഗസ്ഥര്‍ക്ക് കോട്ടയം ജില്ലാ ദുരന്തനിവാരണ അതോറിറ്റി ചെയര്‍മാന്‍ കൂടിയായ ജില്ലാ കളക്ടര്‍ ജോണ്‍ വി. സാമുവല്‍ നിര്‍ദേശം നല്‍കി. പഞ്ചായത്തുതലങ്ങളില്‍ ഇത്തരം അവസ്ഥ ഉണ്ടാവുകയാണെങ്കില്‍ വൈദ്യുതി ലൈനില്‍ വീണു കിടക്കുന്ന മരങ്ങളും മരച്ചില്ലകളും നീക്കുന്നതിന് പഞ്ചായത്തുതല ഏമര്‍ജന്‍സി റെസ്‌പോണ്‍സ് ടീമുകളുടെ സഹായം കെ.എസ്.ഇ.ബി. ജീവനക്കാരുമായി ചേര്‍ന്ന് നല്‍കുന്നതിന് പഞ്ചായത്ത് സെക്രട്ടറിയും അതതു വാര്‍ഡ് മെമ്പര്‍മാരും ശ്രദ്ധിക്കണമെന്നും ഇക്കാര്യത്തില്‍ ദുരന്ത നിവാരണ നിയമപ്രകാരം പ്രവര്‍ത്തിക്കാന്‍ തദ്ദേശ സ്വയംഭരണ വകുപ്പ് ജോയിന്റ് ഡയറക്ടര്‍ നടപടി സ്വീകരിക്കണമെന്നും ഉത്തരവില്‍ പറയുന്നു.
രാത്രിയില്‍ അപകടകരമായ രീതിയില്‍ മരങ്ങള്‍ വൈദ്യുതി കമ്പികള്‍ക്കുമേല്‍ വീണു കിടന്ന് വലിയ അപകടം ഉണ്ടാകുന്ന സാഹചര്യമുണ്ട്. ഇത് ഒഴിവാക്കാനായി മരങ്ങളും മറ്റും വെട്ടിമാറ്റാന്‍ ആവശ്യമായ വെളിച്ചം (ആസ്‌ക ലൈറ്റ്) ലഭ്യമാക്കാന്‍ അഗ്‌നിരക്ഷാ വകുപ്പിനെ ചുമതലപ്പെടുത്തി. കെ.എസ്.ഇ.ബി. ആവശ്യപെട്ടാല്‍ ഇത്തരം സഹായം നല്‍കാനും മരങ്ങള്‍ ലൈനില്‍ നിന്നു നീക്കാനുള്ള സഹായം ചെയ്യണമെന്നും ഉത്തരവില്‍ പറയുന്നു.
പ്രതികരിക്കാൻ ഇവിടെ എഴുതുക