വത്തിക്കാന്: ആഗോള കത്തോലിക്കാ സഭയുടെ മാര്പാപ്പയായി ലെയോ പതിനാലാമന് സ്ഥാനമേല്ക്കുന്ന ചടങ്ങ് വത്തിക്കാനിലെ സെന്റ് പീറ്റേഴ്സ് ചത്വരത്തിലെ പ്രധാന വേദിയില് പുരോഗമിക്കുന്നു. വിശുദ്ധ പത്രോസിന്റെ കബറിടത്തിലെത്തി പ്രാര്ത്ഥിച്ച ശേഷമാണ് സെന്റ് പീറ്റേഴ്സ് ചത്വരത്തിലേക്കുള്ള പ്രദക്ഷിണം ആരംഭിച്ചത്.
ചടങ്ങുകള് ആരംഭിക്കും മുമ്പ് തുറന്ന വാഹനത്തിലെത്തി സെന്റ് പീറ്റേഴ്സ് ചത്വരത്തില് ഒത്തുചേര്ന്ന വിശ്വാസികളെ ആശിര്വദിച്ചു.
കുര്ബാനയ്ക്ക് മാര്പാപ്പ കാര്മികത്വം വഹിക്കും. കുര്ബാനമധ്യേ വലിയ ഇടയന്റെ വസ്ത്രവും സ്ഥാനമോതിരവും ഏറ്റുവാങ്ങി വിശുദ്ധ പത്രോസിന്റെ പിന്ഗാമിയായി മാര്പാപ്പ സഭയുടെ സാരഥ്യം ഏറ്റെടുത്തു.
സ്ഥാനാരോഹണ ചടങ്ങിന് സാക്ഷ്യം വഹിക്കാന് ലോകനേതാക്കള് വത്തിക്കാനിലെത്തി.രാജ്യസഭാ ഉപാധ്യക്ഷന്റെ നേതൃത്വത്തിലുള്ള ഇന്ത്യന് സംഘവും വത്തിക്കാനിലെത്തിയിട്ടുണ്ട്. യുഎസ് വൈസ് പ്രസിഡന്റ് ജെ ഡി വാന്സ് ,സ്റ്റേറ്റ് സെക്രട്ടറി മാര്കോ റൂബിയോ യുക്രെയ്ന് പ്രസിഡന്റ് വ്ളോഡിമിര് സെലന്സ്കി, കാനേഡിയന് പ്രധാനമന്ത്രി മാര്ക് കാര്ണി തുടങ്ങിയ ലോകനേതാക്കള് ചടങ്ങില് പങ്കെടുക്കുന്നുണ്ട്.
