തുർക്കിയിൽ ഓഫീസ് തുറക്കാൻ കോൺഗ്രസിന് പണം എവിടെ നിന്ന് ? സഹായിച്ചത് ആര് : ചോദ്യങ്ങൾ ഉയരുന്നു

ന്യൂഡൽഹി : ലോക്‌സഭാ തെരഞ്ഞെടുപ്പിൽ മത്സരിക്കാൻ പണമില്ലെന്ന് പറഞ്ഞ് മുതലക്കണ്ണീർ വാർത്ത കോൺഗ്രസ്, 2019 ൽ തുർക്കിയിൽ വിദേശ ഓഫീസ് തുറന്നതായി റിപ്പോർട്ട്. ഇന്ത്യയ്‌ക്കെതിരെ പാകിസ്ഥാനൊപ്പം നിന്ന തുർക്കിയെ ബഹിഷ്ക്കരിക്കാൻ സോഷ്യൽ മീഡിയയിൽ ആഹ്വാനങ്ങൾ ശക്തമാകുമ്പോഴാണ് കോൺഗ്രസ്, തുർക്കിയിൽ വിദേശ ഓഫീസ് തുറന്ന റിപ്പോർട്ടുകൾ പുറത്ത് വരുന്നത് .

തുർക്കിയിലെ ഈ ഓഫീസിന്റെ തലവൻ മുഹമ്മദ് യൂസഫ് ഖാനാണ്. ഇന്ത്യൻ നാഷണൽ കോൺഗ്രസിനെ വിദേശത്ത് പ്രോത്സാഹിപ്പിക്കുന്ന കോൺഗ്രസ് അനുഭാവികളുടെ ഒരു കൂട്ടായ്മയാണ് ഇന്ത്യൻ ഓവർസീസ് കോൺഗ്രസ്. രാഹുൽ ഗാന്ധിയുടെ അടുത്ത സുഹൃത്തായ സാം പിട്രോഡയാണ് ഐഒസിയുടെ പ്രസിഡന്റ്.

തുർക്കിയിൽ ഓഫീസ് തുറന്നതും ഒരു തുർക്കിയെ പ്രസിഡന്റാക്കുന്ന നിലപാടും വിവാദങ്ങൾക്ക് കാരണമായിരുന്നു. എന്നാൽ ഇപ്പോൾ തുർക്കിയും ഇന്ത്യയും തമ്മിലുള്ള ബന്ധം വഷളായ സാഹചര്യത്തിൽ കോൺഗ്രസിന് നേരെ വീണ്ടും ചോദ്യം ഉയരുകയാണ് . തുർക്കിയിലേക്ക് പോയി ഓഫീസ് തുറക്കാൻ കോൺഗ്രസിന് എവിടെ നിന്ന് പണം ലഭിച്ചു? തുര്‍ക്കിയിൽ ആരാണ് കോണ്‍ഗ്രസിനെ സഹായിച്ചത് എന്നീ ചോദ്യങ്ങളും ഉയരുന്നു.

മാത്രമല്ല, ഇന്നലെ നടന്ന പത്രസമ്മേളനത്തിൽ കോൺഗ്രസ് നേതാക്കളായ ജയറാം രമേശിനോടും പവൻ ഖേരയോടും തുർക്കി ബഹിഷ്‌കരണവുമായി ബന്ധപ്പെട്ട ചോദ്യങ്ങൾ ചോദിച്ചപ്പോൾ, അവർക്ക് പെട്ടെന്ന് വ്യക്തമായ ഉത്തരങ്ങൾ നൽകാൻ പോലും കഴിഞ്ഞില്ല.