തിരുവനന്തപുരം: 2025 ഏപ്രില് 15ലെ കണക്കു പ്രകാരം ആകെ കണ്ടെത്തിയതില് 21.26 ശതമാനം കുടുംബങ്ങള് കേരളത്തില് അതിദരിദ്രരായി തുടരുന്നു.2025 നവംബര് 1ന് മുമ്പ് സംസ്ഥാനത്തെ അതിദാരിദ്ര്യത്തില് നിന്ന് പൂര്ണ്ണമായും മുക്തമാക്കുമെന്നാണ് സര്ക്കാര് പ്രഖ്യാപിച്ചിരുന്നത്. കുറഞ്ഞ മാസങ്ങള്ക്കുളളില് അതു നിറവേറ്റുക വലിയ വെല്ലുവിളിയാവും.
50,401 കുടുംബങ്ങളെ (78.74%) ഇതുവരെ അതിദാരിദ്ര്യത്തില് നിന്ന് മുക്തരാക്കുവാന് സാധിച്ചുവെന്നാണ് സര്ക്കാര് കണക്ക്. ഇനി അതി ദാരിദ്ര്യമുക്തരാക്കാനുള്ള കുടുംബങ്ങളില് ഏറിയ പങ്കും സ്ഥിരവരുമാനം ആവശ്യമുള്ളവരും സുരക്ഷിതമായ വാസസ്ഥലം ആവശ്യമുള്ളവരുമാണ്.വരുമാനം നേടാന് പ്രയാസമുള്ള 5350 കുടുംബങ്ങളില് ജീവനോപാധി ആരംഭിയ്ക്കുവാന് ശേഷിയുള്ള 4359 കുടുംബങ്ങള്ക്ക് കുടുംബശ്രീ സംസ്ഥാന മിഷന്റെ നേതൃത്വത്തിലുള്ള ഉജ്ജീവനം പദ്ധതി വഴിയും തദ്ദേശ സ്വയംഭരണ സ്ഥാപനങ്ങള് നേരിട്ടും മറ്റ് വകുപ്പുകള് മുഖേനയും വരുമാനം ലഭിക്കാനുള്ള പ്രവര്ത്തനങ്ങളില് ഏര്പ്പെടുന്നതിന് സഹായം നല്കി.
സര്ക്കാരിന്റെയും തദ്ദേശ സ്ഥാപനങ്ങളുടെയും യോജിച്ച പ്രവര്ത്തനം വഴി മനസ്സോടിത്തിരി മണ്ണ്’ ക്യാമ്പയിന് മുഖേന ഇത് വരെ 8.89 ഏക്കര് ഭൂമിയും റവന്യു വകുപ്പ് മുഖേന 5.5 ഏക്കര് റവന്യു ഭൂമിയും കണ്ടെത്തി.
