ഇഡിയ്‌ക്കെതിരെ പ്രതിഷേധം : പതാകയുമായി ട്രെയിനു മുകളിൽ ചാടി കയറി , ട്രെയിൻ തടഞ്ഞ് യൂത്ത് കോൺഗ്രസ് പ്രവർത്തകർ

ന്യൂഡൽഹി: നാഷണൽ ഹെറാൾഡ് കേസിൽ സോണിയയ്‌ക്കും, രാഹുലിനുമെതിരെ എൻഫോഴ്‌സ്‌മെൻ്റ് ഡയറക്ടറേറ്റ് കുറ്റപത്രം സമർപ്പിച്ചതിൽ പ്രതിഷേധിച്ച് യൂത്ത് കോൺഗ്രസ് പ്രവർത്തകർ ട്രെയിൻ തടഞ്ഞു. പട്നയിലായിരുന്നു കോൺഗ്രസ് പ്രവർത്തകരുടെ പ്രതിഷേധം .

“ഇഡി-ഷാഹി നഹി ചലേഗി!” മുഴക്കി പാർട്ടി പതാകകൾ വീശി, ട്രെയിനിൽ മുകളിൽ ചാടി കയറിയായിരുന്നു പ്രതിഷേധം . പ്രതിഷേധത്തിനിടെ റെയിൽവേ ഗേറ്റ് അടച്ചത് യാത്രക്കാർക്കും വാഹന ഗതാഗതത്തിനും സാരമായ ബുദ്ധിമുട്ടുണ്ടാക്കി.സ്ഥിതിഗതികൾ നിയന്ത്രിക്കാൻ റെയിൽവേ പ്രൊട്ടക്ഷൻ ഫോഴ്സിന്റെ (ആർപിഎഫ്) സുരക്ഷാ ഉദ്യോഗസ്ഥരെ വിന്യസിക്കുകയും പ്രതിഷേധക്കാരെ നീക്കം ചെയ്യാൻ ശ്രമിക്കുകയും ചെയ്തു.

ഗാർഡനിബാഗിലും റെയിൽവേ ക്രോസ് തടഞ്ഞത് മേഖലയിൽ കനത്ത ഗതാഗതക്കുരുക്കിന് കാരണമായി.അതേസമയം ട്രെയിൻ തടഞ്ഞവർക്കെതിരെ റെയിൽവേയുടെ ഭാഗത്ത് നിന്ന്  കർശന നടപടിയുണ്ടാകുമെന്നാണ് സൂചന .