വിൻ സി അലോഷ്യസിന്റെ പരാതി; അന്വേഷണത്തിന് മൂന്നംഗ സമിതി രൂപീകരിച്ച് അമ്മ, ഷൈൻ ടോം ചാക്കോയിൽ നിന്നും വിശദീകരണം തേടും

കൊച്ചി: നടൻ ഷൈൻ ടോം ചാക്കോയ്‌ക്കെതിരെ യുവനടി വിൻസി അലോഷ്യസ് നൽകിയ പരാതിയിൽ നടപടി എടുക്കാനൊരുങ്ങി ‘അമ്മ’ സംഘടന. മൂന്നംഗ സമിതി പരാതിയിൽ അന്വേഷണം നടത്തും. സരയു, വിനു മോഹൻ, അൻസിബ എന്നിവരടങ്ങിയ മൂന്നംഗ സമിതിയാണ് പരാതിയിൽ അന്വേഷണം നടത്തുക.

ഷൈൻ ടോം ചാക്കോയിൽ നിന്നുള്ള ദുരനുഭവം പങ്കു വെച്ചുള്ള പരാതിയാണ് അമ്മ അസോസിയേഷന് വിൻ സി നൽകിയത്. ഇ-മെയിൽ വഴിയാണ് പരാതി നൽകിയത്. ഒരു സീൻ പ്രാക്ടീസ് ചെയ്യുന്നതിന് ഇടയിൽ എന്തോ ഒരു വെള്ള പൊടി വായിൽ നിന്ന് പുറത്തേക്ക് തുപ്പുന്നത് കണ്ടുവെന്നാണ് നടിയുടെ വെളിപ്പെടുത്തൽ. നടൻ സിനിമാസെറ്റിൽ സ്ഥിരമായി ലഹരി ഉപയോഗിക്കുന്ന വ്യക്തിയാണെന്നും സിനിമ പൂർത്തിയാക്കിയത് സഹപ്രവർത്തകരുടെ അഭ്യർത്ഥന പ്രകാരമായിരുന്നെന്നും വിൻസി പറഞ്ഞു.

സിനിമ ചിത്രീകരണത്തിനിടെ ലഹരി ഉപയോഗിച്ച നടൻ തന്നോട് മോശമായി പെരുമാറിയെന്നായിരുന്നു വിൻസിയുടെ വെളിപ്പെടുത്തൽ. ലഹരി ഉപയോഗിക്കുന്നവർക്കൊപ്പം ഇനി അഭിനയിക്കില്ലെന്ന് നടി വ്യക്തമാക്കുകയും ചെയ്തു. ഇൻസ്റ്റഗ്രാമിൽ പങ്കുവച്ച വീഡിയോയിലായിരുന്നു നടി വെളിപ്പെടുത്തൽ നടത്തിയത്. എന്നാൽ നടന്റെ പേര് നടി വെളിപ്പെടുത്തിയിട്ടില്ലായിരുന്നു. എന്നാൽ താര സംഘടനയ്‌ക്ക് നൽകിയ പരാതിയിൽ നടന്റെ പേര് വെളിപ്പെടുത്തിയിട്ടുണ്ട്.