പത്തനംതിട്ട: റെയില്വേ ട്രാക്കില് മരിച്ച നിലയില് കണ്ടെത്തിയ ഐബി ഉദ്യോഗസ്ഥ മേഘയുടെ കുടുംബത്തിന് പൂര്ണ പിന്തുണയുമായി കേന്ദ്രമന്ത്രി സുരേഷ് ഗോപി. പത്തനംതിട്ട അതിരുങ്കലിലെ മേഘയുടെ വീട്ടിലെത്തിയാണ് കേന്ദ്രമന്ത്രി കുടുംബത്തെ ആശ്വസിപ്പിച്ചത്.
മേഘയുടെ മരണവുമായി ബന്ധപ്പെട്ട് കുടുംബം ഉന്നയിക്കുന്ന ആരോപണങ്ങള് പരിശോധിക്കുമെന്നു മന്ത്രി ഉറപ്പു നല്കി. ബിജെപി ജില്ലാ അധ്യക്ഷന് അഡ്വ. വി.എ. സൂരജും ഒപ്പമുണ്ടായിരുന്നു. അന്വേഷണം ത്വരിതപ്പെടുത്താന് ശ്രമിക്കുമെന്നും അതില് വിട്ടുവീഴ്ചകള് ഉണ്ടാകില്ലെന്നും അന്വേഷണത്തിന് ആവശ്യമായ നടപടി കൈക്കൊള്ളുന്നതിനു മുന്കൈയെടുക്കുമെന്നും അദ്ദേഹം പറഞ്ഞു. മേഘയെ മരണത്തിലേക്കു നയിച്ചത് എടപ്പാള് സ്വദേശിയും ഐബി ഉദ്യോഗസ്ഥനുമായ സുകാന്ത് സുരേഷുമായുള്ള സൗഹൃദമാണെന്നാണു കുടുംബത്തിന്റെ ആരോപണം.
മകളുടെ ബാങ്ക് അക്കൗണ്ടിന്റെ വിശദാംശങ്ങള് പരിശോധിച്ചതില് നിന്ന് സുകാന്ത് മേഘയെ സാമ്പത്തികമായി ചൂഷണം ചെയ്തെന്ന വിവരം വ്യക്തമായെന്നും കുടുംബം പറഞ്ഞിരുന്നു. ട്രെയിനിങ് പൂര്ത്തിയാക്കി ജോലിയില് പ്രവേശിച്ച 2024 മെയ് മുതലുള്ള ശമ്പളത്തിന്റെ ഒരു ഭാഗം പതിവായി സുകാന്തിന്റെ അക്കൗണ്ടിലേക്കു മാറ്റിയിരുന്നു എന്നതിനു തെളിവു ലഭിച്ചതായാണ് മേഘയുടെ പിതാവ് മധുസൂദനന് പറഞ്ഞത്.
ആദ്യ കാലങ്ങളില് കൊടുത്തിരുന്ന പണം പലപ്പോഴായി തിരികെ മകളുടെ അക്കൗണ്ടിലേക്ക് വന്നിട്ടുള്ളതിനു രേഖയുണ്ടെങ്കിലും പിന്നീട് പണം അങ്ങോട്ടു മാത്രമാണു പോയിട്ടുള്ളതെന്നും മധുസൂദനന് പറഞ്ഞു. സംഭവത്തില് പോലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചിട്ടുണ്ട്. ആരോപണ വിധേയനായ സുകാന്ത് സുരേഷ് ഒളിവില് പോയതായി പോലീസ് സ്ഥിരീകരിച്ചു. ഓഫിസിലും മലപ്പുറത്തെ വീട്ടിലും തിരച്ചില് നടത്തിയിട്ടും ഇയാളെ കണ്ടെത്താനായില്ലെന്നും ഫോണ് ഓഫാണെന്നും പോലീസ് അറിയിച്ചു.
മേഘയെ അവസാനമായി ഫോണില് വിളിച്ചതും സുകാന്ത് തന്നെയാണെന്നു സ്ഥിരീകരിച്ചിട്ടുണ്ട്. എന്നാല്, അന്വേഷണത്തില് പോലീസിന്റെ ഭാഗത്തുനിന്ന് വീഴ്ചപറ്റിയെന്നാണ് പിതാവ് മധുസൂദനന് പറയുന്നത്. പ്രതിയെന്നു സംശയിക്കുന്ന ആളെ നിരീക്ഷണത്തില് വയ്ക്കുന്നതില് പോലീസിനു വീഴ്ച്ചപറ്റിയെന്നും മധുസൂദനന് ആരോപിച്ചു.
