ലഖ്നൗ : ഉത്തർപ്രദേശിലെ മുസാഫർനഗർ ജില്ലയിലെ ചാർത്തവൽ പ്രദേശത്ത് സ്ത്രീക്കെതിരെ മുത്തലാഖ് ചൊല്ലുകയും ക്രൂരത കാണിക്കുകയും ചെയ്ത ഒരു കേസ് പുറത്തുവന്നു. ഭർത്താവ് ആദ്യം മുത്തലാഖ് ചൊല്ലി ഉപേക്ഷിച്ച ഈ സ്ത്രീയെ പിന്നീട് വീട്ടുകാരുടെ മധ്യസ്ഥതയിൽ നിക്കാഹ് ഹലാല മാർഗത്തിലൂടെ വീണ്ടും വിവാഹം കഴിച്ചു. എന്നാൽ ഇപ്പോൾ ഫോണിലൂടെ വീണ്ടും ഭർത്താവ് തന്നെ മുത്തലാഖ് ചൊല്ലി ഉപേക്ഷിച്ചെന്ന് ആരോപിച്ചാണ് യുവതി രംഗത്തെത്തിയിരിക്കുന്നത്. യുവതിയുടെ പരാതിയിൽ പോലീസ് സംഭവം അന്വേഷിച്ചുവരികയാണ്.
ഇന്നലെയാണ് സ്ത്രീ തന്റെ രണ്ട് കുട്ടികളുമായി ചാർത്തവൽ പോലീസ് സ്റ്റേഷനിലെത്തി ഭർത്താവിനെതിരെ പരാതി നൽകിയത്. ഭർത്താവ് തന്നെ മർദ്ദിക്കുകയും വീട്ടിൽ നിന്ന് പുറത്താക്കുകയും തുടർന്ന് ഫോണിലൂടെ മുത്തലാഖ് ചൊല്ലുകയും ചെയ്തുവെന്ന് യുവതി ആരോപിച്ചു. യുവതിയുടെ മൊഴി രേഖപ്പെടുത്തിയ പോലീസ് കേസെടുത്ത് അന്വേഷണം ആരംഭിച്ചു.
സ്ത്രീ പറയുന്നതനുസരിച്ച് അവർ 7 വർഷം മുമ്പാണ് വിവാഹിതരായത്. ചാർത്തവൽ പോലീസ് സ്റ്റേഷൻ പരിധിയിലുള്ള ഹസൻപൂർ ലുഹാരി ഗ്രാമത്തിൽ നിന്നുള്ള ഒരു യുവാവിനെയാണ് അവർ വിവാഹം കഴിച്ചത്. ഇവർക്ക് രണ്ട് കുട്ടികളുണ്ട്. വിവാഹത്തിന് തൊട്ടുപിന്നാലെ ഭർത്താവ് സ്ത്രീധനം ആവശ്യപ്പെടാൻ തുടങ്ങിയെന്ന് സ്ത്രീ ആരോപിക്കുന്നു.
സ്ത്രീധനം കൊണ്ടുവരാത്തതിന് അയാൾ തന്നെ മർദിക്കാറുണ്ടായിരുന്നുവെന്നും യുവതി പരാതിയിൽ പറഞ്ഞു. പിന്നീട് ഒരു വർഷം മുമ്പ് ഭർത്താവ് ഫോണിലൂടെ മുത്തലാഖ് ചൊല്ലിയതായി സ്ത്രീ പറഞ്ഞു. ഇതിനുശേഷം രണ്ട് കുടുംബങ്ങളും ഒത്തുതീർപ്പിലെത്തി യുവതി നിക്കാഹ് ഹലാല മാർഗത്തിലൂടെ തന്റെ മുൻ ഭർത്താവിനെ വീണ്ടും വിവാഹം കഴിച്ചു. പക്ഷേ വിവാഹം കഴിഞ്ഞിട്ടും ഭർത്താവിന്റെ അക്രമം കുറഞ്ഞില്ല, അയാൾ വീണ്ടും യുവതിയെ മർദിക്കാൻ തുടങ്ങി.
ഒരു മാസം മുമ്പ് ഭർത്താവ് തന്നെ മർദ്ദിക്കുകയും വീട്ടിൽ നിന്ന് പുറത്താക്കുകയും ചെയ്തുവെന്നാണ് യുവതി ഇപ്പോൾ ആരോപിക്കുന്നത്. ഇതിനുശേഷം യുവതി സഹോദരിയുടെ വീട്ടിലാണ് താമസിച്ച് വന്നിരുന്നത്. തുടർന്ന് രണ്ട് ദിവസം മുമ്പ് ഭർത്താവിൽ നിന്ന് ഒരു കോൾ വന്നതായും അയാൾ മൊബൈലിന്റെ സ്പീക്കർ ഓൺ ചെയ്തതായും സ്ത്രീ പറയുന്നു.
ഈ സമയത്ത് ഭർത്താവ് ഇന്ന് തന്നെ എല്ലാ വഴക്കും അവസാനിപ്പിക്കാം എന്ന് പറഞ്ഞു, തുടർന്ന് മൂന്ന് തവണ തലാഖ് പറഞ്ഞതിന് ശേഷം തന്നെ ഉപേക്ഷിച്ചതായി യുവതി പറഞ്ഞു. അതേ സമയം ഈ മുഴുവൻ കാര്യത്തിലും പോലീസ് സ്ത്രീയുടെ മൊഴി രേഖപ്പെടുത്തുകയും കേസ് അന്വേഷിക്കുകയും ചെയ്യുന്നുണ്ട്.
