ന്യൂഡൽഹി : പ്രധാനമന്ത്രി നരേന്ദ്രമോദിയുമായുള്ള അഭിമുഖത്തിനായി രണ്ടുദിവസത്തോളം ഉപവാസമിരുന്നെന്ന് പോഡ്കാസ്റ്ററും എഐ ഗവേഷകനുമായ ലെക്‌സ് ഫ്രിഡ്മാന്‍. മോദിയുമായുള്ള സംഭാഷണത്തിനിടെയാണ് ഫ്രിഡ്മാന്‍ ഇക്കാര്യം വെളിപ്പെടുത്തിയത്. അഭിമുഖത്തിനായി കഴിഞ്ഞ 45 മണിക്കൂറായി താന്‍ ഉപവാസത്തിലാണെന്നും , ഗായത്രിമന്ത്രം സ്വായത്തമാക്കിയെന്നും ഫ്രിഡ്മാന്‍ പറഞ്ഞത്.
ഉപവാസത്തെക്കുറിച്ച് മോദിയോടുള്ള ചോദ്യത്തിന് മുമ്പ് ആമുഖമായാണ് ഫ്രിഡ്മാന്‍, തന്റെ കാര്യവും വെളിപ്പെടുത്തിയത്. ‘ഞാന്‍ ഇപ്പോള്‍ ഉപവാസത്തിലാണ്. ഏതാണ്ട് രണ്ടുദിവസമായി, 45 മണിക്കൂര്‍. ഞാന്‍ വെള്ളം മാത്രമേ കുടിച്ചിട്ടുള്ളൂ, ഭക്ഷണം കഴിച്ചിട്ടില്ല. ഈ അഭിമുഖത്തോടുള്ള ആദരസൂചകമായാണത്, ശരിയായ മാനസിക നിലയിലേക്കും ആത്മീയതലത്തിലേക്കുമെത്താനാണ് ഉപവാസം അനുഷ്ഠിച്ചത്’, ഫ്രിഡ്മാന്‍ പറഞ്ഞു.
‘നിങ്ങള്‍ ദിവസങ്ങളോളം ഉപവാസമിരിക്കാറുണ്ടെന്ന് ഞാന്‍ വായിച്ചിട്ടുണ്ട്. എന്തിനാണ് ഉപവസിക്കുന്നതെന്നും അപ്പോള്‍ നിങ്ങളുടെ മാനസികാവസ്ഥ എന്താണെന്നും പറയാമോ’, എന്നായിരുന്നു മോദിയോട് ഫ്രിഡ്മാന്റെ ചോദ്യം.
‘നിങ്ങള്‍ ഉപവസിക്കുകയാണ് എന്നറിഞ്ഞത് എന്നെ ആശ്ചര്യപ്പെടുത്തുന്നു. അതിനേക്കാളേറെ എന്നോടുള്ള ബഹുമാനാര്‍ഥമാണ് നിങ്ങള്‍ അങ്ങനെ ചെയ്യുന്നത് എന്നത് ആശ്ചര്യംവര്‍ധിപ്പിക്കുന്നു. അതിന് നിങ്ങളോട് ആഴത്തിലുള്ള കൃതജ്ഞത രേഖപ്പെടുത്തുന്നു’, എന്ന് ആമുഖമായി പറഞ്ഞശേഷം മോദി, ഫ്രിഡ്മാന്റെ ചോദ്യത്തിന് മറുപടി പറഞ്ഞു.
ഇന്ത്യയിൽ, മതപാരമ്പര്യങ്ങൾ ദൈനംദിന ജീവിതവുമായി ആഴത്തിൽ ഇഴചേർന്നിരിക്കുന്നുവെന്ന് മോദി പറഞ്ഞു. ഹിന്ദുമതം കേവലം ഒരു കൂട്ടം ആചാരങ്ങളല്ല, മറിച്ച് ജീവിതത്തെ തന്നെ നയിക്കുന്ന ഒരു തത്ത്വചിന്തയാണെന്ന് അദ്ദേഹം ചൂണ്ടിക്കാട്ടി.
ശരീരം, മനസ്സ്, ബുദ്ധി, ആത്മാവ്, മനുഷ്യത്വം എന്നിവ ഉയർത്തുന്നതിനും, സ്വയം അച്ചടക്കവും സന്തുലിതാവസ്ഥയും വളർത്തിയെടുക്കുന്നതിനുള്ള ഒരു ഉപകരണമായി വർത്തിക്കുന്നതിനും ഇന്ത്യൻ തിരുവെഴുത്തുകളിൽ വിവരിച്ചിരിക്കുന്ന നിരവധി പാതകളിൽ ഒന്നാണ് ഉപവാസം.നമ്മുടെ സുപ്രീം കോടതി ഒരിക്കൽ ഹിന്ദുമതത്തിന് ഒരു മികച്ച വ്യാഖ്യാനം നൽകി.
ഹിന്ദുമതം ആചാരങ്ങളെയോ ആരാധനാ രീതികളെയോ കുറിച്ചല്ല, മറിച്ച് അത് ഒരു ജീവിതരീതിയാണെന്നും ജീവിതത്തെ തന്നെ നയിക്കുന്ന ഒരു തത്ത്വചിന്തയാണെന്നും അവർ പ്രസ്താവിച്ചിട്ടുണ്ട്. ചിലപ്പോൾ ഉപവാസം അച്ചടക്കം വളർത്തിയെടുക്കാനുള്ള ഒരു മാർഗമാണെന്ന് ഞാൻ കാണുന്നു.ഉപവാസം തന്നെ ഒരിക്കലും മന്ദഗതിയിലാക്കിയിട്ടില്ല; പകരം, അത് പലപ്പോഴും ഉൽപ്പാദനക്ഷമതയും ചിന്തയുടെ വ്യക്തതയും വർദ്ധിപ്പിക്കുന്നുവെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക