തിരുവനന്തപുരം: സംസ്ഥാനത്ത് രജിസ്റ്റര് ചെയ്യുന്ന വാഹനങ്ങള്ക്ക് മാര്ച്ച് ഒന്ന് മുതല് രജിസ്ട്രേഷന് സര്ട്ടിഫിക്കറ്റ് പ്രിന്റ് ചെയ്ത് നല്കില്ല. ഡിജിറ്റല് രൂപത്തിലുള്ള ആര്.സിയാകും നല്കുക.മോട്ടോര് വാഹന വകുപ്പാണ് ഇക്കാര്യം അറിയിച്ചത്.
ഇത് സംബന്ധിച്ച നേരത്തെ തന്നെ സംസ്ഥാന സര്ക്കാര് തീരുമാനമെടുത്തിരുന്നു. ഡ്രൈവിംഗ് ലൈസന്സുകളുടെ പ്രിന്റിംഗ് ഒഴിവാക്കി ഡിജിറ്റല് രൂപത്തില് മാത്രം നല്കുന്ന നടപടികള്ക്ക് നേരത്തെ തന്നെ സംസ്ഥാന മോട്ടോര് വാഹന വകുപ്പ് തുടക്കമിട്ടിരുന്നു.
രജിസ്ട്രേഷന് സര്ട്ടിഫിക്കറ്റുകള് ഡിജിറ്റലൈസ് ചെയ്യുന്നതിന്റെ ഭാഗമായി വാഹനങ്ങളുടെ ഹൈപ്പോതിക്കേഷനുമായി ബന്ധപ്പെട്ട സേവനങ്ങളും ഡിജിറ്റലൈസ് ചെയ്യാന് തീരുമാനിച്ചിട്ടുണ്ട്.അതുകൊണ്ടുതന്നെ ബാങ്കുകളും അംഗീകൃത ധനകാര്യ സ്ഥാപനങ്ങളും മോട്ടോര് വാഹന വകുപ്പിന്റെ പരിവാഹന് പോര്ട്ടലുമായി ബന്ധിപ്പിക്കണം. പരിവാഹന് പോര്ട്ടലുമായി ബന്ധിപ്പിച്ചിട്ടുള്ള ബാങ്കുകളില് നിന്നോ ധനകാര്യ സ്ഥാപനങ്ങളില് നിന്നോ മാത്രമേ 2025 മാര്ച്ച് ഒന്നാം തീയ്യതി മുതല് വാഹന രജിസ്ട്രേഷന് സര്ട്ടിഫിക്കറ്റുമായി ബന്ധപ്പെട്ട ഹൈപ്പോതിക്കേഷന് സേവനങ്ങള് ലഭ്യമാവുകയുള്ളൂ എന്ന് മോട്ടോര് വാഹന വകുപ്പ് വാര്ത്താക്കുറിപ്പില് അറിയിച്ചു.
