തിരുവനന്തപുരം : 2013ല്‍ മലപ്പുറം മേലാറ്റൂര്‍ ഇലക്ട്രിക്കല്‍ സെക്ഷനില്‍ കെഎസ്ഇബി കരാര്‍ ജീവനക്കാരനായ പി മുഹമ്മദ് ഷോക്കേറ്റ് മരിക്കാനിടയായ സംഭവത്തില്‍ ആശ്രിതര്‍ക്കുള്ള നഷ്ടപരിഹാരം ബന്ധപ്പെട്ട ഉദ്യോഗസ്ഥര്‍ നല്‍കണമെന്ന് കെഎസ്ഇബി. ലൈനിലെ ജോലികള്‍ക്കിടയാണ് മുഹമ്മദ് ഷോക്കേറ്റ് മരിച്ചത്. സംഭവത്തില്‍ നഷ്ടപരിഹാരത്തുകയായ 8.58 ലക്ഷം രൂപ വീഴ്ചവരുത്തിയ സബ് എന്‍ജിനീയറും ലൈന്‍മാനും തുല്യമായി നല്‍കണമെന്ന് കാണിച്ച് സിഎംഡി ഉത്തരവിറക്കി. വകുപ്പുതല അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ഈ ഉത്തരവ്. നഷ്ടപരിഹാര തുകയ്‌ക്ക് എംപ്ലോയീസ് കോംപന്‍സേഷന്‍ കമ്മീഷണര്‍ പലിശ നിര്‍ദ്ദേശിക്കുന്ന പക്ഷം അതുകൂടെ ഇവരില്‍നിന്ന് ഈടാക്കും. സബ് എന്‍ജിനീയര്‍ അബ്ദുല്‍ വഹാബ്, ലൈന്‍മാന്‍ ഉമൈന്‍ കബീര്‍ എന്നിവരില്‍ നിന്നാണ് നഷ്ടം ഈടാക്കുക. കരാര്‍ ജീവനക്കാരനായ മുഹമ്മദിനെ പോസ്റ്റില്‍ കയറ്റുന്നതിനു മുന്‍പ് വേണ്ട സുരക്ഷ ഉറപ്പുവരുത്തിയില്ല എന്നതാണ് ഇരുവര്‍ക്കും എതിരായ കുറ്റാരോപണം.
പ്രതികരിക്കാൻ ഇവിടെ എഴുതുക: