ന്യൂഡല്‍ഹി: വഖ്ഫ് നിയമഭേദഗതി ബില്ല് മുസ്ലിങ്ങളുടെ അവകാശങ്ങളെ ഹനിക്കുന്നതാണെന്നും സംയുക്തപാര്‍ലമെന്ററി സമിതിയുടെ റിപ്പോര്‍ട്ട് ഭരണഘടനാ വിരുദ്ധമാണെന്നും ആരോപിച്ച് സമിതിയിലെ പ്രതിപക്ഷ എംപിമാര്‍ വിയോജനക്കുറിപ്പെഴുതി. കോണ്‍ഗ്രസ്, ഓള്‍ ഇന്ത്യ മജ്ലിസെ ഇത്തിഹാദുല്‍ മുസ്ലിമീന്‍, തൃണമൂല്‍ കോണ്‍ഗ്രസ്, ഡിഎംകെ എന്നീ കക്ഷികളുടെ എംപിമാരാണ് വിയോജിപ്പ് രേഖപ്പെടുത്തിയത്. സനാതന്‍ സന്‍സ്ത, ഹിന്ദു ജാഗ്രതി സമിതി തുടങ്ങിയ സംഘടനകള്‍ സമിതിക്കു മുന്നില്‍ വെച്ച ശുപാര്‍ശകള്‍ തള്ളണമെന്നും അവര്‍ ആവശ്യപ്പെട്ടു. ബിജെപി അംഗങ്ങളും എന്‍ഡിഎ സഖ്യകക്ഷികളും നിര്‍ദ്ദേശിച്ച 14 മാറ്റങ്ങള്‍ അടങ്ങിയ റിപ്പോര്‍ട്ട് 15-11 ഭൂരിപക്ഷത്തോടെയാണ് സംയുക്തപാര്‍ലമെന്ററി സമിതി അംഗീകരിച്ചിരിക്കുന്നത്.
ഏതൊരു ദുഷ്ടനും വഖ്ഫ് സ്വത്തില്‍ അവകാശം ഉന്നയിക്കാന്‍ ബില്ലിലെ വ്യവസ്ഥകള്‍ അവകാശം നല്‍കുമെന്ന് കോണ്‍ഗ്രസ് എംപി ഗൗരവ് ഗൊഗോയി പറയുന്നു. ബില്‍ വഖ്ഫ് സംവിധാനങ്ങളുടെ സ്വയംഭരണ അവകാശം എടുത്തുകളയുമെന്നും മുസ്ലിംകളുടെ ഭരണഘടനാ അവകാശങ്ങളെ ഹനിക്കുമെന്നും കോണ്‍ഗ്രസ് എംപിമാരായ സയ്യിദ് നസീര്‍ ഹുസൈന്‍, ഡോ. മുഹമ്മദ് ജവാദ്, ഇമ്രാന്‍ മസൂദ് എന്നിവര്‍ വിയോജനക്കുറിപ്പില്‍ പറയുന്നു. വഖ്ഫ് ബോര്‍ഡുകളില്‍ മുസ്ലിംകള്‍ അല്ലാത്തവരെ ഉള്‍പ്പെടുത്തുന്നതിനെ ശിവസേന യുബിടി അംഗം അരവിന്ദ് സാവന്ത് എതിര്‍ത്തു.
പ്രതികരിക്കാൻ ഇവിടെ എഴുതുക