വിക് ആന്‍ സീ (നെതര്‍ലാന്‍റ്സ്) : ഇന്ത്യയുടെ ദൊമ്മരാജു ഗുകേഷ് പത്താം റൗണ്ടിലും വിജയം കൊയ്ത് ടാറ്റാ സ്റ്റീല്‍ ചെസ്സില്‍ തന്റെ പടയോട്ടം തുടരുകയാണ്. ഇപ്പോള്‍ ഏഴര പോയിന്‍റോടെയാണ് ഗുകേഷ് മുന്നില്‍ നില്‍ക്കുന്നത്. ഇനി മൂന്ന് റൗണ്ട് കൂടിയേ ബാക്കിയുള്ളൂ.
പത്താം റൗണ്ടില്‍ മാക്സ് വാര്‍ഡര്‍ഡാമിനെയാണ് ഗുകേഷ് തോല്‍പിച്ചത്. ലോക ചെസ് കിരീടം നേടിയ ശേഷം ഗുകേഷ് പങ്കെടുക്കുന്ന ആദ്യ ടൂര്‍ണ്ണമെന്‍റാണ് നെതര്‍ലാന്‍റ്സില്‍ ഇപ്പോള്‍ നടന്നുവരുന്ന ടാറ്റാ സ്റ്റീല്‍ ചെസ്. ചെസിലെ വിംബിള്‍ഡണ്‍ എന്നറിയപ്പെടുന്ന ഈ ടൂര്‍ണ്ണമെന്‍റില്‍ ഗുകേഷ് കിരീടം കൊയ്യും എന്ന് തന്നെയാണ് ചെസിലെ വിദഗ്ധരുടെ അഭിപ്രായം. ഗുകേഷിന് തൊട്ട് പിന്നില്‍ നില്‍ക്കുന്ന ഉസ്ബെക് താരം നോഡിര്‍ബെക് അബ്ദുസത്തൊറൊവ് സുസ്ഥിരമായ പ്രകടനമാണ് കാഴ്ചവെയ്‌ക്കുന്നത്. പത്താം റൗണ്ടില്‍ അദ്ദേഹം അലക്സി സാരനയെതോല്‍പിച്ചതോടെ ഏഴു പോയിന്‍റോടെ രണ്ടാം സ്ഥാനത്ത് നില്‍ക്കുകയാണ്.
മൂന്നാം സ്ഥാനത്ത് നിന്നിരുന്ന റഷ്യന്‍ താരം വ്ളാഡിമിര്‍ ഫീഡോസീവിനെ പ്രജ്ഞാനന്ദ അട്ടിമറിച്ചതാണ് പത്താം റൗണ്ടിലെ മറ്റൊരു പ്രധാനസംഭവം. ഇതോടെ പ്രജ്ഞാനന്ദ ആറര പോയിന്‍റോടെ മൂന്നാം സ്ഥാനത്തെത്തി. ഫീഡോസീവിന് ഇപ്പോള്‍ ആറ് പോയിന്‍റേ ഉള്ളൂ.
ടാറ്റാസ്റ്റീല്‍ ചെസില്‍ ഇന്ത്യക്കാരുടെ മുന്നേറ്റം
എന്തായാലും 18 വയസ്സുള്ള ഗുകേഷും 19 വയസ്സുള്ള പ്രജ്ഞാനന്ദയും ടാറ്റാ സ്റ്റീല്‍ ചെസ്സില്‍ മുന്‍നിരസ്ഥാനങ്ങളില്‍ തുടരുന്നതോടെ ഇന്ത്യ വീണ്ടും ലോക ചെസ്സിലെ അജയ്യ ശക്തിയെന്ന സ്ഥാനം അടയാളപ്പെടുത്തുകയാണ്. അടുത്ത മൂന്ന് റൗണ്ടുകളില്‍ കൂടി ജയം നേടിയാല്‍ ഗുകേഷിന്റെ ഇഎല്‍ഒ റേറ്റിംഗ് 2800 കടക്കും. ഇത് വലിയൊരു നേട്ടമായിരിക്കും. മാഗ്നസ് കാള്‍സന്‍ എന്ന അജയ്യതാരത്തിന് വെല്ലുവിളിയായി വളരുകയാണ് ഗുകേഷ്. ഗുകേഷിനോട് ലോക ചെസ്സില്‍ പോരാടുമോ എന്ന് പല മാധ്യമങ്ങളും ഉയര്‍ത്തിയ ചോദ്യത്തിന് കഴിഞ്ഞ ദിവസം മാഗ്നസ് കാള്‍ സന്‍ മറുപടി പറഞ്ഞിരുന്നു. ഇനി ഒരൊറ്റ തവണകൂടി താന്‍ ലോകചെസ് കിരീടത്തിന് മത്സരിക്കും എന്നാണ് കാള്‍സന്റെ പ്രതികരണം. അതിനര്‍ത്ഥം അടുത്ത ലോകചെസില്‍ ഗുകേഷിനെ നേരിടാനുള്ള കാന്‍ഡിഡേറ്റ് ചെസില്‍ മാഗ്നസ് കാള്‍സനുംം പങ്കെടുത്തേക്കും എന്നാണ് പുറത്തുവരുന്ന സൂചനകള്‍. അങ്ങിനെയെങ്കില്‍ അടുത്ത ലോകചെസ് പോരാട്ടം ലോകമാകെ കണ്ണോര്‍ക്കുന്ന വന്‍പോരാട്ടമായി മാറും.
പ്രതികരിക്കാൻ ഇവിടെ എഴുതുക