പ്രയാഗ്രാജ്: ക്ഷേത്രങ്ങളെ സര്ക്കാരുകളുടെ നിയന്ത്രണത്തില് മോചിപ്പിക്കണമെന്ന ആവശ്യമുയര്ത്തി ധര്മ്മ സന്സദ്. ക്ഷേത്രങ്ങളുടെ നടത്തിപ്പിന് സനാതന ബോര്ഡ് രൂപീകരിക്കണമെന്ന് സംന്യാസിസമ്മേളനം പ്രധാനമന്ത്രിയോട് അഭ്യര്ത്ഥിച്ചു. ബോര്ഡിന്റെ ചട്ടക്കൂടിനും യോഗം രൂപം നല്കി. ഇത് അനുസരിച്ച് രാജ്യത്തെ നാല് ശങ്കരാചാര്യന്മാരാകും ബോര്ഡിന്റെ രക്ഷാധികാരികള്.
അയ്യായിരത്തോളം സംന്യാസിമാരാണ് ധര്മ്മ സന്സദില് പങ്കെടുത്തത്. സന്ത് ദേവകിനന്ദന് ഠാക്കൂര്, നിംബാര്ക് പീഠാധീശ്വര് ജഗദ്ഗുരു ആചാര്യ ശ്രീറാം ശ്യാംചരണ് ശ്രീജി മഹാരാജ്, ജഗദ്ഗുരു രാഘവാചാര്യ, ജഗദ്ഗുരു വല്ലഭാചാര്യ, മഹന്ത് രാജു ദാസ്, സാധ്വി പ്രാചി, ജഗദ്ഗുരു വിദ്യാഭാസ്കര്, ചിന്മയാനന്ദ് ബാപ്പു, മഹന്ത് രാജു ദാസ്, സാധ്വി സരസ്വതി, ജഗദ്ഗുരു സൂര്യാചാര്യ തുടങ്ങിയവര് സന്നിഹിതരായിരുന്നു.
വഖഫ് ബോര്ഡിന്റെ അംഗീകാരം റദ്ദാക്കണമെന്ന് ധര്മ്മസന്സദിനെ അഭിവാദ്യം ചെയ്ത സന്ത് ദേവകി നന്ദന് ഠാക്കൂര് ആവശ്യപ്പെട്ടു. പാകിസ്ഥാനിലും ബംഗ്ലാദേശിലും ഹിന്ദുക്കള്ക്ക് ബോര്ഡില്ല. ഭാരതം ജനാധിപത്യ രാജ്യമായതുകൊണ്ട് വഖഫ് ബോര്ഡിന് അനുമതി ലഭിച്ചു. എന്നാല് അവര് നിയമങ്ങള്ക്ക് മീതെ പറക്കാനാണ് മോഹിക്കുന്നത്. അത് അംഗീകരിക്കാനാവില്ല. കുംഭമേളാ നഗരിക്കുമേല് പോലും അവര് അവകാശവാദമുന്നയിക്കുകയാണ്. ഇത്തരം വങ്കത്തം നോക്കിയിരിക്കാനാകില്ലെന്ന് അദ്ദേഹം പറഞ്ഞു.
സനാതനബോര്ഡ് രാജ്യത്തുടനീളം നടപ്പാക്കണം, എല്ലാ വലിയ ക്ഷേത്രങ്ങളിലും ഗോശാല സ്ഥാപിക്കണം, മതപരിവര്ത്തനം തടയാന് പാവപ്പെട്ട ഹിന്ദു കുടുംബങ്ങള്ക്ക് സാമ്പത്തിക സഹായം നല്കണം തുടങ്ങിയ ആവശ്യങ്ങള് യോഗം മുന്നോട്ടുവച്ചു.
ഈശ്വരന് എന്ത് വഴിപാട് നല്കണമെന്ന് സര്ക്കാരും ജില്ലാ ഭരണകൂടങ്ങളും തീരുമാനിക്കുന്ന രീതി അവസാനിപ്പിച്ചേ മതിയാകൂ. പശുക്കള് റോഡില് അലഞ്ഞുതിരിയാനുള്ളവയല്ല. ക്ഷേത്രത്തിലെ പണം കൊണ്ട് വിദ്യാലയങ്ങളും ആശുപത്രികളും നിര്മ്മിക്കും. നാരായണന്റെ സ്വത്ത് നരസേവയ്ക്കായി വിനിയോഗിക്കണം, ദേവകി നന്ദന് ഠാക്കൂര് പറഞ്ഞു.
