സെക്രട്ടേറിയറ്റ്/ പിഎസ്‌സി/ എ ജി ഓഫിസ് / ഓഡിറ്റ് വകുപ്പുകളില്‍ അസിസ്റ്റന്റ് / ഓഡിറ്റര്‍: അപേക്ഷ ക്ഷണിച്ചു

തിരുവനന്തപുരം: ഗവണ്‍മെന്റ് സെക്രട്ടേറിയറ്റ്/ കേരള പബ്ലിക് സര്‍വിസ് കമീഷന്‍/ അഡ്വക്കറ്റ് ജനറല്‍ ഓഫിസ് (എറണാകുളം)/ സ്റ്റേറ്റ് ഓഡിറ്റ് വകുപ്പ്/ വിജിലന്‍സ് ട്രൈബൂണല്‍/ എന്‍ക്വയറി കമീഷണര്‍ ആന്‍ഡ് സ്‌പെഷല്‍ ജഡ്ജ് ഓഫിസ് / വകുപ്പുകളില്‍ അസിസ്റ്റന്റ് / ഓഡിറ്റര്‍ തസ്തികയിലേക്ക് നേരിട്ടുള്ള നിയമനത്തിന് പബ്ലിക് സര്‍വിസ് കമീഷന്‍ അപേക്ഷകള്‍ ക്ഷണിച്ചു. വിശദ വിവരങ്ങളടങ്ങിയ വിജ്ഞാപനം 2024 ഡിസംബര്‍ 31ലെ ഗസറ്റിലും www.keralapsc.gov.in/notificationലും ലഭ്യമാണ്. ശമ്പളനിരക്ക് 39,300-83,000 രൂപ. പ്രതീക്ഷിത ഒഴിവുകളിലേക്കാണ് തെരഞ്ഞെടുപ്പ്. റാങ്ക് ലിസ്റ്റിന് മൂന്നു വര്‍ഷംവരെ പ്രാബല്യമുണ്ടായിരിക്കും.
യോഗ്യത: ഏതെങ്കിലും വിഷയത്തില്‍ അംഗീകൃത സര്‍വകലാശാല ബിരുദം/ തത്തുല്യം. പ്രായപരിധി 18-36 വയസ്സ്. മറ്റ് പിന്നാക്ക സമുദായത്തില്‍പെട്ടവര്‍ക്കും (ഒ.ബി.സി) പട്ടികജാതി/ വര്‍ഗ വിഭാഗത്തിലുള്ളവര്‍ക്കും നിയമാനുസൃത വയസ്സിളവ് ലഭിക്കും.അപേക്ഷാ ഫീസില്ല. ഔദ്യോഗിക വെബ് സൈറ്റില്‍ ഒറ്റത്തവണ രജിസ്റ്റര്‍ ചെയ്ത ശേഷമാണ് അപേക്ഷിക്കേണ്ടത്. രജിസ്റ്റര്‍ ചെയ്തിട്ടുള്ളവര്‍ യൂസര്‍ ഐ.ഡിയും പാസ്‌വേഡും ഉപയോഗിച്ച് ലോഗിന്‍ ചെയ്ത് സ്വന്തം പ്രൊഫൈലില്‍ ഓണ്‍ലൈനായി ജനുവരി 29 വരെ അപേക്ഷ സമര്‍പ്പിക്കാം.