ട്രെയിനില്‍ നിന്ന് പുറത്തേക്ക് തെറിച്ച് വീണെങ്കിലും അത്ഭുതകരമായി രക്ഷപ്പെട്ട് യുവാവ്

കോഴിക്കോട്: ട്രെയിനിന്റെ വാതിലിന് സമീപം ഇരുന്ന് യാത്ര ചെയ്ത യുവാവ് പുറത്തേക്ക് തെറിച്ച് വീണെങ്കിലും അത്ഭുതകരമായി രക്ഷപ്പെട്ടു.വടകര അഴിയൂര്‍ ചോമ്പാല ടെലിഫോണ്‍ എക്‌സ്‌ചേഞ്ചിന് സമീപം താമസിക്കുന്ന കിഴക്കെ പുതിയ പറമ്പത്ത് വിനായക് ദത്ത് (32) ആണ് നിസാര പരിക്കുകളോടെയെങ്കിലും രക്ഷപ്പെട്ടത്.

തിങ്കളാഴ്ച സുഹൃത്തുക്കള്‍ക്കൊപ്പം എറണാകുളത്ത് നിന്നും ഇന്റര്‍സിറ്റി എക്‌സപ്രസില്‍ നാട്ടിലേക്ക് മടങ്ങവെയാണ് അപകടം. ട്രെയിനില്‍ തിരക്കായിരുന്നതിനാലാണ് വിനായക് ദത്തും സുഹൃത്തുക്കളും വാതിലിന് സമീപം ഇരുന്ന് യാത്ര ചെയ്തത്.

ഇരിങ്ങാലക്കുട പുതുക്കാട് ഭാഗത്ത് എത്തിയപ്പോള്‍ വിനായക് അബദ്ധത്തില്‍ തെന്നി വീഴുകയായിരുന്നു. പരിക്കേറ്റെങ്കിലും സമീപത്തെ റോഡിലേക്ക് നടന്ന് എത്തി അതു വഴി വന്ന ബൈക്കിന് കൈ കാണിച്ച് സമീപത്തെ പുതുക്കാട് സഹകരണ ആശുപത്രിയില്‍ എത്തി ചികിത്സ തേടി.

പിന്നാലെ സുഹൃത്തുക്കളെ ഫോണില്‍ ബന്ധപ്പെട്ട് താന്‍ ആശുപത്രിയിലുണ്ടെന്ന വിവരം അറിയിച്ചു. പിന്നീട് സുഹൃത്തക്കളെത്തി വിനായകിനെ മാഹി ഗവ. ആശുപത്രിയിലേക്ക് കൊണ്ടുപോയി.