മൃതദേഹവുമായി ലൈംഗിക ബന്ധത്തില്‍ ഏര്‍പ്പെടുന്നത് ബലാത്സംഗക്കുറ്റമാണോ? വിധി പറഞ്ഞ് ഛത്തീസ്ഗഢ് ഹൈക്കോടതി

റായ് പൂര്‍: മൃതദേഹവുമായി ലൈംഗിക ബന്ധത്തില്‍ ഏര്‍പ്പെടുന്നത് ബലാത്സംഗക്കുറ്റമോ എന്ന വിഷയത്തില്‍ വിധി പറഞ്ഞ് ഛത്തീസ് ഗഢ് ഹൈക്കോടതി ഡിവിഷന്‍ ബെ‍ഞ്ച്. ഈ പ്രവൃത്തി ഇന്ത്യന്‍ ശിക്ഷാനിയമപ്രകാരമോ പോക്സോ നിയമപ്രകാരമോ ബലാത്സംഗക്കുറ്റമായി കാണാനാവില്ലെന്നാണ് ഛത്തീസ് ഗഢ് ഹൈക്കോടതി ചീഫ് ജസ്റ്റിസ് രമേഷ് സിന്‍ഹയും ജസ്റ്റിസ് ബിഭു ദത്ത ഗുരുവും വിധിച്ചത്.

നിതിന്‍ യാദവ്, നീലു നാഗേഷ് എന്ന നീലകാന്ത് നാഗേഷ് എന്നിവര്‍ പ്രായപൂര്‍ത്തിയാകാത്ത പെണ്‍കുട്ടിയെ മരിച്ചതിന് ശേഷവും ബലാത്സംഗം ചെയ്തുവെന്ന കേസിലാണ് കോടതിയുടെ ഈ വിധി. “മരിച്ചതിന് ശേഷം മൃതദേഹത്തെ ബലാത്സംഗം ചെയ്തത് ഇന്ത്യന്‍ ശിക്ഷാനിമയപ്രകാരമോ (ഐപിസി) പോക്സോ നിയമപ്രകാരമോ ബലാത്സംഗക്കുറ്റമായി കാണാനാകില്ല. ഇര ജീവിച്ചിരിക്കുന്നുവെങ്കില്‍ മാത്രമേ ഇത് ബലാത്സംഗക്കുറ്റമായി കാണാനാകു”. – ഹൈക്കോടതി ഡിവിഷന്‍ ബെഞ്ച് പറയുന്നു.

“നിതിന്‍ യാദവ്, നീലു നാഗേഷ് എന്ന നീലകാന്ത് നാഗേഷ് എന്നിവര്‍ മൃതദേഹത്തെ ബലാത്സംഗം ചെയ്തു എന്നത് ഭയാനകമായ പ്രവൃത്തി തന്നെയാണെന്നതില്‍ സംശയമില്ല. ഒരാള്‍ക്ക് ചിന്തിക്കാന്‍ കഴിയുന്നതിന് അപ്പുറമുള്ള കുറ്റമാണ്. പക്ഷെ വസ്തുതയെന്തെന്നാല്‍ ഇന്ത്യന്‍ ശിക്ഷാനിയമത്തിലെ (ഐപിസി) 363,376(3) എന്നീ വകുപ്പുകള്‍ പ്രകാരമോ, 2012ലെ പോക്സോ നിയമത്തിലെ ആറാം വകുപ്പ് പ്രകാരമോ 1989ലെ ബലാത്സംഗക്കുറ്റനിയമത്തിലെ 3(2)(അഞ്ച്) പ്രകാരമോ ഇവര്‍ക്കെതിരെ കേസെടുക്കാനാവില്ല. കാരണം അങ്ങിനെ കേസെടുക്കണമെങ്കില്‍ ഇര ജീവിച്ചിരിക്കേണ്ടതുണ്ട്. “- മൃതദേഹത്തെ ബലാത്സംഗം ചെയ്തു എന്ന കുറ്റത്തില്‍ നിന്നും പ്രതിയെ ഒഴിവാക്കിക്കൊണ്ടുള്ള വിധിയില്‍ പറയുന്നു. അതേ സമയം മറ്റു കുറ്റകൃത്യങ്ങളുടെ പേരില്‍ വിചാരണ നടക്കുകയാണ്. പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോകാല്‍, ബലാത്സംഗം, കൊലപാതകം എന്നീ കുറ്റങ്ങളുടെ പേരില്‍ വിചാരണ ചെയ്യപ്പെടുന്ന രണ്ട് പേര്‍ നല്‍കിയ ഹര്‍ജിയിലാണ് ഛത്തീസ് ഗഢ് ഹൈക്കോടതിയുടെ ഈ വിധി.