ന്യൂദൽഹി : സർദാർ വല്ലഭായ് പട്ടേലിന്റെ ചരമവാർഷിക ദിനത്തിൽ പ്രധാനമന്ത്രി നരേന്ദ്ര മോദി ഞായറാഴ്ച അദ്ദേഹത്തിന് ആദരാഞ്ജലികൾ അർപ്പിച്ചു. സോഷ്യൽ മീഡിയ പ്ലാറ്റ്‌ഫോമായ എക്‌സിലൂടെയാണ് പ്രധാനമന്ത്രി തന്റെ ആദരവ് അറിയിച്ചത്. രാജ്യത്തിന്റെ ഐക്യത്തിനും അഖണ്ഡതയ്‌ക്കും വേണ്ടിയുള്ള പ്രചോദനമാണ് ഉരുക്കുമനുഷ്യനെന്ന് അദ്ദേഹം വിശേഷിപ്പിച്ചു.
” രാജ്യത്തിന്റെ ഉരുക്കുമനുഷ്യൻ സർദാർ വല്ലഭായ് പട്ടേലിന് അദ്ദേഹത്തിന്റെ ചരമവാർഷികത്തിൽ നൂറു കണക്കിന് അഭിവാദ്യങ്ങൾ. രാഷ്‌ട്രത്തിന്റെ ഐക്യത്തിനും അഖണ്ഡതയ്‌ക്കും വികസിത ഇന്ത്യയുടെ പ്രമേയത്തിന്റെ നേട്ടത്തിനും അദ്ദേഹത്തിന്റെ വ്യക്തിത്വവും പ്രവർത്തനവും രാജ്യക്കാർക്ക് പ്രചോദനമായി തുടരും, ”-അദ്ദേഹം എക്‌സിൽ കുറിച്ചു.
പ്രധാനമന്ത്രിക്ക് പുറമെ കേന്ദ്ര ആഭ്യന്തരമന്ത്രി അമിത് ഷാ പ്രതിരോധ മന്ത്രി രാജനാഥ് സിംഗ് എന്നിവരും പട്ടേലിന് ആദരാഞ്ജലികൾ നേർന്നു.
ഇന്ത്യയുടെ ഉരുക്കുമനുഷ്യൻ എന്നറിയപ്പെടുന്ന സർദാർ വല്ലഭായ് പട്ടേൽ 1875 ഒക്ടോബർ 31 ന് ഗുജറാത്തിലെ നദിയാദിലാണ് ജനിച്ചത്. ഇന്ത്യയുടെ സ്വാതന്ത്ര്യസമരകാലത്ത് അദ്ദേഹം നിർണായക പങ്കുവഹിക്കുകയും 500-ലധികം നാട്ടുരാജ്യങ്ങളെ ഇന്ത്യൻ യൂണിയനിൽ സംയോജിപ്പിക്കുന്നതിൽ നിർണായക പങ്കുവഹിക്കുകയും ചെയ്തു. സ്വതന്ത്ര ഇന്ത്യയുടെ ആദ്യ ഉപപ്രധാനമന്ത്രിയും ആഭ്യന്തര മന്ത്രിയും കൂടിയായിരുന്നു അദ്ദേഹം.
അദ്ദേഹത്തിന്റെ സ്മരണാർത്ഥം 2014-ൽ കേന്ദ്ര സർക്കാർ ദേശീയ ഐക്യദിനം അവതരിപ്പിച്ചു. റിപ്പബ്ലിക് ഓഫ് ഇന്ത്യ കെട്ടിപ്പടുക്കുന്നതിന് സ്വാതന്ത്ര്യത്തിന് മുമ്പുള്ള രാജ്യത്തെ 562 നാട്ടുരാജ്യങ്ങളെയും ഒന്നിപ്പിച്ചതിന്റെ ബഹുമതി സർദാർ പട്ടേലിന് അവകാശപ്പെട്ടതാണ്.
2014 മുതൽ, ഒക്ടോബർ 31 ദേശീയ ഐക്യദിനം അല്ലെങ്കിൽ രാഷ്‌ട്രീയ ഏകതാ ദിവസ് ആയി ആചരിച്ചുവരുന്നു. ഈ അവസരത്തിൽ രാജ്യത്തുടനീളം ‘റൺ ഫോർ യൂണിറ്റി’ സംഘടിപ്പിക്കുന്നു. അതിൽ എല്ലാ തുറകളിലുമുള്ള ആളുകൾ പങ്കെടുക്കുന്നുണ്ട്.
1950 ഡിസംബർ 15 ന് മുംബൈയിലെ ബിർള ഹൗസിൽ വെച്ച് ഹൃദയാഘാതത്തെ തുടർന്ന് പട്ടേൽ അന്തരിച്ചു. 1991-ൽ മരണാനന്തര ബഹുമതിയായി അദ്ദേഹത്തിന് ഭാരതരത്‌ന പുരസ്കാരം ലഭിച്ചു.
