ഹൈദരാബാദ്: പുഷ്പ 2ന്റെ പ്രീമിയറിനിടെ ഹൈദരാബാദിലെ സന്ധ്യ തിയറ്ററിലുണ്ടായ തിക്കിലും തിരക്കിലും പെട്ട് ഒരാള്‍ മരിക്കാനിടയായ സംഭവത്തില്‍ രജിസ്റ്റർ ചെയ്ത കേസിൽ നടൻ അല്ലു അർജുനെ പ്രതി ചേർക്കുമെന്ന് വൃത്തങ്ങൾ അറിയിച്ചു. ഡിസംബർ 4 ന് നടന്ന സംഭവത്തിൽ 35 കാരിയായ രേവതിയുടെ ജീവൻ നഷ്ടടമാകുയും 13 വയസ്സുള്ള മകന് ഗുരുതരമായി പരുക്കേൽക്കുകയും ചെയ്തിരുന്നു.
നടൻ അല്ലു അർജുനെയും തിയേറ്റർ മാനേജ്മെൻ്റിനെയും കേസിൽ പ്രതി ചേർക്കുമെന്ന് വൃത്തങ്ങൾ അറിയിച്ചു. അല്ലു അർജുനെ കാണാൻ ആരാധകർ വേദിയിൽ തടിച്ചുകൂടിയതോടെയാണ് തിക്കും തിരക്കും ഉടലെടുത്തത്.
ദിൽസുഖ് നഗർ സ്വദേശിയായ രേവതി തന്റെ ഭർത്താവ് ഭാസ്‌കറിനും അവരുടെ രണ്ട് മക്കളായ ശ്രീ തേജ് (13), സാൻവിക (7) എന്നിവർക്കുമൊപ്പമാണ് സിനിമാ പ്രീമിയറിന് എത്തിയിരുന്നത്. അല്ലു അർജുൻ എത്തിയപ്പോൾ ജനക്കൂട്ടം കുതിച്ചുയർന്നതോടെ തിക്കിലും തിരക്കിലും പെടുകയായിരുന്നു. സിനിമയിലെ പ്രധാന താരങ്ങൾ തിയറ്ററിലെത്തുമെന്ന പ്രതീക്ഷയിലും സിനിമ കാണാൻ വൻ ജനക്കൂട്ടം തടിച്ചുകൂടിയിരുന്നതായി പോലീസ് പറഞ്ഞു.
“ തിയേറ്റർ സന്ദർശിക്കുമെന്ന് തിയേറ്റർ മാനേജ്‌മെൻ്റിന്റെയോ അഭിനേതാക്കളുടെ ടീമിന്റെയോ ഭാഗത്ത് നിന്ന് ഒരു അറിയിപ്പും ഉണ്ടായിരുന്നില്ല. തിയേറ്റർ മാനേജ്‌മെൻ്റ് തിരക്ക് നിയന്ത്രിക്കാൻ സുരക്ഷ സംബന്ധിച്ച് അധിക വ്യവസ്ഥകളൊന്നും ഏർപ്പെടുത്തിയിട്ടില്ല. തിയേറ്റർ മാനേജ്‌മെൻ്റിന് അവരുടെ വരവിനെക്കുറിച്ച് വിവരമുണ്ടെങ്കിലും അഭിനേതാക്കളുടെ ടീമിന് പ്രത്യേക പ്രവേശനമോ എക്സിറ്റോ ഉണ്ടായിരുന്നില്ല,” ഹൈദരാബാദ് ഡെപ്യൂട്ടി പോലീസ് കമ്മീഷണർ പറഞ്ഞു.
അല്ലു അർജുൻ തന്റെ സ്വകാര്യ സുരക്ഷയോടെയാണ് സിനിമാ തിയേറ്ററിൽ എത്തിയതെന്നും അവിടെ കൂടിയിരുന്നവരെല്ലാം അദ്ദേഹത്തോടൊപ്പം തിയേറ്ററിലേക്ക് കടക്കാൻ ശ്രമിച്ചുവെന്നും പോലീസ് ഉദ്യോഗസ്ഥൻ പറഞ്ഞു.
“അദ്ദേഹത്തിന്റെ വ്യക്തിഗത സുരക്ഷാ ടീം പൊതുജനങ്ങളെ തള്ളിവിടാൻ തുടങ്ങി, ഇത് തിയേറ്ററിൽ ഇതിനകം തന്നെ വലിയ ജനക്കൂട്ടം ഉണ്ടായിരുന്നതിനാൽ സ്ഥിതി കൂടുതൽ വഷളാക്കി. ഈ സാഹചര്യം മുതലെടുത്ത് നടനും അദ്ദേഹത്തിന്റെ സെക്യൂരിറ്റി സംഘത്തിനുമൊപ്പം താഴത്തെ ബാൽക്കണി ഏരിയയിലേക്ക് നിരവധി ആളുകൾ പ്രവേശിച്ചു. ഇതിൽ രേവതിയും അവളുടെ ഏകദേശം 13 വയസ്സുള്ള മകനും ജനപ്രവാഹം കാരണം ശ്വാസംമുട്ടൽ അനുഭവപ്പെട്ടു,” ഉദ്യോഗസ്ഥർ പറഞ്ഞു.
ബഹളത്തിനിടെ ബോധരഹിതരായ രേവതിയെയും മകനെയും വിദ്യാനഗറിലെ ദുർഗാഭായ് ദേശ്മുഖ് ആശുപത്രിയിൽ പ്രവേശിപ്പിച്ചു. എത്തിയപ്പോഴേക്കും രേവതി മരിച്ചതായി സ്ഥിരീകരിച്ചു, ശ്രീ തേജിന്റെ നില ഗുരുതരമായതിനാൽ പിന്നീട് ബേഗംപേട്ടിലെ കിംസ് ആശുപത്രിയിലേക്ക് മാറ്റി.
ഇവൻ്റിൽ നിന്നുള്ള വീഡിയോകളിൽ അല്ലു അർജുൻ തന്റെ കാറിൽ നിന്ന് ആരാധകരെ കൈവീശി കാണിക്കുന്നതും കനത്ത സുരക്ഷയിൽ പുറപ്പെടുന്നതിന് മുമ്പ് വാഹനങ്ങൾക്ക് വഴിയൊരുക്കാൻ അവരോട് ആവശ്യപ്പെടുന്നതും കാണാം.
പ്രതികരിക്കാൻ ഇവിടെ എഴുതുക: