കൊച്ചി: ആനയെഴുന്നള്ളിപ്പിൽ ഹൈക്കോടതിയുടെ മാർഗ നിർദേശങ്ങൾ പാലിച്ചില്ലെന്ന് ആരോപിച്ച് തൃപ്പൂണിത്തുറ പൂർണത്രയീശ ക്ഷേത്രം ഭാരവാഹികൾക്കെതിരേ കേസെടുത്ത് വനംവകുപ്പിന്റെ സോഷ്യൽ ഫോറസ്ട്രി വിഭാഗം. ക്ഷേത്രത്തിലെ വൃശ്ചികോത്സവത്തിൽ ആനകൾ തമ്മിലുളള അകലം മൂന്നു മീറ്റർ ഉണ്ടായിരുന്നില്ലെന്നും ആളുകളും ആനയുമായുളള എട്ടു മീറ്റർ അകലവും പാലിച്ചില്ലെന്നും വനംവകുപ്പ് പരിശോധനയിൽ കണ്ടെത്തി.
തീവെട്ടിയും ആനകളുമായി 5 മീറ്റർ അകലം പാലിക്കണമെന്ന മാർഗ നിർദേശവും ക്ഷേത്രത്തിൽ ലംഘിക്കപ്പെട്ടുവെന്നാണ് സോഷ്യൽ ഫോറസ്ട്രി വിഭാഗം ചൂണ്ടിക്കാണിക്കുന്നത്. നാട്ടാനകളുടെ പരിപാലനചുമതല നൽകിയിരിക്കുന്നത് വനംവകുപ്പിന്റെ സോഷ്യല് ഫോറസ്ട്രി വിഭാഗത്തിനാണ്. അതേസമയം, രാത്രി മഴ പെയ്തതിനാലാണ് ആനകളെ ചേർത്തുനിർത്തേണ്ടിവന്നതെന്നാണ് ക്ഷേത്രഭാരവാഹികളുടെ വിശദീകരണം.
15 ആനകളെയാണ് വൃശ്ചികോത്സവത്തിൽ എഴുന്നള്ളിച്ചത്. ഹൈക്കോടതി നിയന്ത്രണത്തിൽ ഇളവ് തേടി ദേവസ്വം ബോർഡ് കോടതിയെ സമീപിച്ചിരുന്നെങ്കിലും ഇളവ് ലഭിച്ചിരുന്നില്ല.
