തിരുവനന്തപുരം: ലോകത്താകമാനം 3.9 കോടി എച്ച്.ഐ.വി ബാധിതര് ഉണ്ടെന്ന് കണക്കാക്കപ്പെടുന്നു. 2023ല് മാത്രം 13 ലക്ഷം ആളുകളില് പുതുതായി എച്ച്.ഐ.വി അണുബാധ കണ്ടെത്തി. ഇന്ത്യയില് 2023ലെ കണക്ക് പ്രകാരം 25.44 ലക്ഷം ആളുകള് എച്ച്.ഐ.വി ബാധിതരാണ്. 2023ല് ഇന്ത്യയില് 68,451 ആളുകളില് പുതുതായി എച്ച്.ഐ.വി അണുബാധ കണ്ടെത്തി. കഴിഞ്ഞ സാമ്പത്തിക വര്ഷം കേരളത്തില് 1263 പേരിലാണ് എച്ച്.ഐ.വി അണുബാധ കണ്ടെത്തിയത്.
എച്ച്.ഐ.വി. അണുബാധയുടെ സാന്ദ്രത താരതമ്യേന കുറഞ്ഞ സംസ്ഥാനമാണ് കേരളം. പ്രായപൂര്ത്തിയായവരിലെ എച്ച്.ഐ.വി. സാന്ദ്രത ഇന്ത്യയില് 0.20 ആണെങ്കില് അത് കേരളത്തില് 0.07 ആണ്.
എച്ച്.ഐ.വി. ബാധിതരുടെ ചികിത്സയ്ക്കും പരിചരണത്തിനുമായി ആരോഗ്യ വകുപ്പ് വലിയ പ്രാധാന്യമാണ് നല്കുന്നത്. സംസ്ഥാനത്ത് 793 ജ്യോതിസ് കേന്ദ്രങ്ങള് കൗണ്സിലിംഗിനും പരിശോധനയ്ക്കുമായി പ്രവര്ത്തിക്കുന്നു. സംസ്ഥാനത്തെ എല്ലാ മെഡിക്കല് കോളേജുകളിലും കണ്ണൂര്, കൊല്ലം ജില്ലാ ആശുപത്രികളിലും മാനന്തവാടി, കാസര്ഗോഡ്, എറണാകുളം ജനറല് ആശുപത്രികളിലുമായി 15 ഉഷസ് കേന്ദ്രങ്ങള് പ്രവര്ത്തിക്കുന്നുണ്ട്. ഇതുകൂടാതെ മറ്റ് പ്രധാന ആശുപത്രികളില് ലിങ്ക് എ.ആര്.ടി സെന്ററുകളായി ഉഷസ് ഉപകേന്ദ്രങ്ങളും പ്രവര്ത്തിക്കുന്നുണ്ട്. എ.ആര്.ടി. കേന്ദ്രങ്ങളില് രജിസ്റ്റര് ചെയ്ത് ചികിത്സ എടുക്കുന്ന എച്ച്.ഐ.വി. അണുബാധിതര്ക്ക് ആവശ്യമായ തുടര്സേവനങ്ങള് ലഭ്യമാക്കുന്നതിന് ഏഴു ജില്ലകളില് കെയര് സപ്പോര്ട്ട് കേന്ദ്രങ്ങള് പ്രവര്ത്തിക്കുന്നു. ലൈംഗിക-ജന്യ രോഗങ്ങള്ക്കുള്ള ചികിത്സ സൗജന്യമായി ലഭ്യമാക്കുന്നതിന് 23 പുലരി കേന്ദ്രങ്ങളും പ്രവര്ത്തിക്കുന്നു. എച്ച്.ഐ.വി. അണുബാധാ സാധ്യത കൂടുതലുള്ള ലക്ഷ്യ വിഭാഗങ്ങള്ക്കിടയില് എച്ച്.ഐ.വി. പ്രതിരോധ പ്രവര്ത്തനങ്ങള്ക്കായി എല്ലാ ജില്ലകളിലുമായി 64 സുരക്ഷാ പദ്ധതികളും പ്രവര്ത്തിച്ചു വരുന്നു.
