ന്യൂദല്‍ഹി: ഇസ്‌കോണ്‍ ക്ഷേത്രത്തിലെ മുഖ്യ പുരോഹിതന്‍ ചിന്മയ് കൃഷ്ണദാസിനെ ബംഗ്ലാദേശ് ഭരണകൂടം അറസ്റ്റ് ചെയ്തതില്‍ ലോകമാകെ പ്രതിഷേധമുയരണമെന്ന് വിശ്വഹിന്ദു പരിഷത്ത് അന്താരാഷ്‌ട്ര ജനറല്‍ സെക്രട്ടറി ബജ്രംഗ് ലാല്‍ ബഗ്ര.
ഭീരുത്വം നിറഞ്ഞ, ജനാധിപത്യ വിരുദ്ധമായ നടപടിയാണ് ബംഗ്ലാദേശ് സര്‍ക്കാരിന്റേതെന്ന് അദ്ദേഹം പറഞ്ഞു. ബംഗ്ലാദേശിലെ ന്യൂനപക്ഷ വിരുദ്ധ അക്രമങ്ങള്‍ക്കെതിരെ ജനാധിപത്യപരമായാണ് ഇസ്‌കോണും ഹിന്ദുസംഘടനകളും പ്രതിഷേധിച്ചത്. എന്നാല്‍ ഭരണകൂടം അറസ്റ്റും അടിച്ചമര്‍ത്തലുമടക്കം പ്രതികാരനടപടി സ്വീകരിക്കുകയാണ്. ബംഗ്ലാദേശിലെ വിഷയത്തില്‍ ലോക സമൂഹവും ആഗോള സംഘടനകളും ഇടപെടുന്നില്ല എന്നത് ദൗര്‍ഭാഗ്യകരമാണ്. ഹിന്ദുക്കളുടെ മനുഷ്യാവകാശങ്ങള്‍ സംരക്ഷിക്കാന്‍ ബംഗ്ലാദേശ് ഭരണകൂടത്തില്‍ സമ്മര്‍ദ്ദം ചെലുത്താന്‍ അന്താരാഷ്‌ട്ര സമൂഹം രംഗത്തുവരണമെന്ന് ബജ്രംഗ് ലാല്‍ ബഗ്ര ആവശ്യപ്പെട്ടു.
ചിന്മോയ് കൃഷ്ണ ദാസിനെ ഉടന്‍ മോചിപ്പിക്കണം. ഹിന്ദു ആചാര്യന്മാര്‍ക്കെതിരായ അതിക്രമത്തില്‍ ഭാരതം ശക്തമായ നിലപാട് സ്വീകരിക്കണം, അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: