ഹൈദരാബാദ്: സയ്യദ് മുഷ്താഖ് അലി ക്രിക്കറ്റ് ടൂര്ണ്ണമെന്റില് മഹാരാഷ്ട്രയോട് പൊരുതിത്തോറ്റ് കേരളം. അവസാന ഓവര് വരെ നീണ്ട ആവേശത്തിനൊടുവില് നാല് വിക്കറ്റിനായിരുന്നു മഹാരാഷ്ട്രയുടെ വിജയം. 43 റണ്സുമായി പുറത്താകാതെ നിന്ന ദിവ്യാങ് ഹിങ്കാനേക്കറാണ് മത്സരം മഹാരാഷ്ട്രയ്ക്ക് അനുകൂലമാക്കിയത്. കേരളത്തിന്റെ രണ്ട് വിക്കറ്റും ഹിങ്കാനേക്കര് നേടിയിരുന്നു.
ടോസ് നേടിയ മഹാരാഷ്ട്ര കേരളത്തെ ബാറ്റിങ്ങിനയച്ചു. സഞ്ജു സാംസണും രോഹന് കുന്നുമ്മലും ചേര്ന്ന് കേരളത്തിന് അതിവേഗത്തിലുള്ള തുടക്കം നല്കി. കേരള സ്കോര് 43ലെത്തിയപ്പോള് സഞ്ജു(19) പുറത്തായത് തിരിച്ചടിയായി. അധികം വൈകാതെ വിഷ്ണു വിനോദും(ഒമ്പത്) സല്മാന് നിസാറും(ഒന്ന്) കൂടി പുറത്തായി. രോഹന് കൂട്ടായി മുഹമ്മദ് അസറുദ്ദീന് എത്തിയതോടെ കേരളത്തിന്റെ ഇന്നിങ്സിന് വീണ്ടും വേഗത്തിലായി. 24 പന്തുകള് നേരിട്ട രോഹന് അഞ്ച് ഫോറും രണ്ട് സിക്സുമടക്കം 45 റണ്സെടുത്തു. താരം പുറത്തായതിന് പിന്നാലെയെത്തിയ സച്ചിന് ബേബിയും നന്നായി കളിച്ചു. മുഹമ്മദ് അസറുദ്ദീന് (29 പന്തില് 40)ആണ് പിന്നീട് പുറത്തായ കേരള ബാറ്റര്. 25 പന്തില് 40 റണ്സുമായി സച്ചിന് ബേബി പുറത്താകാതെ നിന്നു. ഏഴാമനായി ഇറങ്ങി 14 പന്തില് 24 റണ്സെടുത്ത അബ്ദുള് ബാസിതും കേരള ബാറ്റിങ് നിരയില് തിളങ്ങി.
മറുപടി ബാറ്റിങ്ങിന് ഇറങ്ങിയ മഹാരാഷ്ട്രയ്ക്ക് രണ്ടാം ഓവറില് തന്നെ ക്യാപ്റ്റന് ഋതുരാജ് ഗെയ്ക്വാദിന്റെ വിക്കറ്റ് നഷ്ടമായി. നിധീഷാണ് ഋതുരാജിനെ പുറത്താക്കി കേരളത്തിന് മികച്ച തുടക്കം നല്കിയത്. എന്നാല് രാഹുല് ത്രിപാഠിയും അര്ഷിന് കുല്ക്കര്ണ്ണിയും ചേര്ന്നുള്ള കൂട്ടുകെട്ട് മഹാരാഷ്ട്ര ഇന്നിങ്സിനെ മുന്നോട്ടു നീക്കി. അര്ഷിന് കുല്ക്കണ്ണി 24ഉം രാഹുല് ത്രിപാഠി 44ഉം റണ്സെടുത്തു. തുടര്ന്നെത്തിയ അസിം കാസിയും 32 റണ്സുമായി ഭേദപ്പെട്ട പ്രകടനം കാഴ്ച വച്ചു.
എന്നാല് മത്സരം അവസാന അഞ്ച് ഓവറുകളിലേക്ക് കടക്കുമ്പോള് മഹാരാഷ്ട്രയ്ക്ക് ജയിക്കാന് അറുപത് റണ്സിലേറെ വേണ്ടിയിരുന്നു. കളി കേരളത്തിന് അനുകൂലമായേക്കുമെന്ന് കരുതിയ ഘട്ടത്തിലാണ് ഒറ്റയാള് മികവുമായി ദിവ്യാങ് ഹിങ്കാനേക്കര് കളം നിറഞ്ഞത്. 18 പന്തില് നിന്ന് 43 റണ്സുമായി പുറത്താകാതെ നിന്ന ദിവ്യാങ് ഒരു പന്ത് ബാക്കി നില്ക്കെ മഹാരാഷ്ട്രയെ വിജയത്തിലെത്തിച്ചു. അഞ്ച് ഫോറും രണ്ട് സിക്സും അടങ്ങുന്നതായിരുന്നു ദിവ്യാങ്ങിന്റെ ഇന്നിങ്സ്. കേരളത്തിന് വേണ്ടി സിജോമോന് ജോസഫും നിധീഷും രണ്ട് വിക്കറ്റുകള് വീതം വീഴ്ത്തി.
