ഹൊബാര്‍ട്ട്: പാകിസ്ഥാനെതിരായ മൂന്ന് മത്സരങ്ങളുടെ ടി 20 പരമ്പര തൂത്തുവാരി ഓസ്ട്രേലിയ. അവസാന മത്സരത്തില്‍ ഏഴ് വിക്കറ്റിന്റെ വിജയം സ്വന്തമാക്കിയാണ് അവര്‍ പരമ്പര തൂത്തുവാരിയത്.
ആദ്യം ബാറ്റ് ചെയ്ത പാകിസ്ഥാന്‍ 18.1 ഓവറില്‍ 117 റണ്‍സിന് എല്ലാവരും പുറത്തായി. മറുപടി ബാറ്റിങ്ങില്‍ 11.2 ഓവറില്‍ മൂന്ന് വിക്കറ്റ് മാത്രം നഷ്ടപ്പെടുത്തി 118 റണ്‍സെടുത്ത് ഓസ്ട്രേലിയ ലക്ഷ്യം മറികടന്നു. മാര്‍ക്കസ് സ്റ്റോയിനിസിന്റെ വെടിക്കെട്ടാണ് ഓസ്‌ട്രേലിയന്‍ വിജയം അനായാസമാക്കിയത്. 27 പന്തില്‍ അഞ്ച് ഫോറും അഞ്ച് സിക്‌സും സഹിതം 61 റണ്‍സെടുത്ത സ്റ്റോയിനിസ് പുറത്താകാതെ നിന്നു. ക്യാപ്റ്റന്‍ ജോഷ് ഇംഗ്ലിസ് 27 റണ്‍സെടുത്ത് മികച്ച പിന്തുണ നല്‍കി. ജെയ്ക് ഫ്രെയ്‌സര്‍ മക്ഗര്‍ഗ് 18 റണ്‍സുമെടുത്തു.
നേരത്തെ ടോസ് നേടിയ പാകിസ്ഥാന്‍ ബാറ്റിങ് തിരഞ്ഞെടുക്കുകയായിരുന്നു. 28 പന്തില്‍ നിന്ന് 41 റണ്‍സ് നേടിയ ബാബര്‍ അസമാണ് അവരുടെ ടോപ് സ്‌കോറര്‍. ഹസീബുള്ളാഹ് ഖാന്‍ 24 റണ്‍സും ഷഹീന്‍ ഷാ അഫ്രീദി 16ഉം ഇര്‍ഫാന്‍ ഖാന്‍ 10ഉം റണ്‍സ് നേടി. മറ്റൊരു താരവും രണ്ടക്കം കടന്നതുമില്ല. ഇതോടെയാണ് പാകിസ്ഥാന്‍ 117-ല്‍ ഒതുങ്ങിയത്. ഓസ്‌ട്രേലിയയ്‌ക്കായി ആരോണ്‍ ഹാര്‍ഡി മൂന്നും സ്‌പെന്‍സര്‍ ജോണ്‍സണും ആദം സാംബയും രണ്ട് വീതം വിക്കറ്റുകളും വീഴ്‌ത്തി.
മാര്‍ക്കസ് സ്റ്റോയിനിസാണ് കളിയിലെ താരം. സ്‌പെന്‍സര്‍ ജോണ്‍സണ്‍ പരമ്പരയുടെ താരവുമായി തിരഞ്ഞെടുക്കപ്പെട്ടു.
പ്രതികരിക്കാൻ ഇവിടെ എഴുതുക: