ചെന്നൈ: വിവാഹ ഡോക്യുമെന്ററിയുമായി ബന്ധപ്പെട്ട് ധനുഷിനെ വിമര്‍ശിച്ചുള്ള തുറന്ന കത്തിന് പിന്നാലെ നടി നയന്‍താരക്കെതിരെ തമിഴ്‌നാട്ടില്‍ സൈബറാക്രമണം രൂക്ഷം. വിഷയത്തിലിതുവരെയും ധനുഷ് പ്രതികരിച്ചിട്ടില്ല. എന്നാല്‍ ധനുഷിനോട് അടുപ്പമുള്ളവര്‍ തമിഴ് ചാനലുകളിലും, സാമൂഹികമാധ്യമങ്ങളില്‍ ഒളിഞ്ഞിരുന്നും നയന്‍താരയെ വ്യക്തിപരമായി അധിക്ഷേപിക്കാനുള്ള ശ്രമത്തിലാണ്.
നാനും റൗഡി താന്‍ എന്ന സിനിമ, നിര്‍മാതാവായ ധനുഷിന് നഷ്ടമുണ്ടാക്കിയെന്നും സിനിമ പ്രൊമോഷന്‍ പരിപാടികളില്‍ നിന്ന് വിട്ടുനില്‍ക്കാറുള്ള നയന്‍താരയാണ് പണത്തിന്റെ പേരില്‍ കത്തയയ്‌ക്കുന്നതെന്നുമാണ് വിമര്‍ശനം. നയന്‍താരയെ പിന്തുണച്ചത് മലയാളി നടിമാര്‍ മാത്രമാണെന്ന വ്യാജപ്രചാരണവും ഇവര്‍ നടത്തുന്നു. ധനുഷിനൊപ്പം അഭിനയിച്ച നിരവധി നടിമാര്‍ നയന്‍താരയുടെ പോസ്റ്റ് ലൈക്ക് ചെയ്തിരുന്നു. ശ്രുതി ഹാസന്‍, ദിയാ മിര്‍സ, ശില്‍പ റാവു, ഏകതാ കപൂര്‍ തുടങ്ങിയ മലയാളികളല്ലാത്ത നടികളും നയന്‍താരയെ പിന്തുണച്ച വിവരം മറച്ചുവച്ചാണ് ഇവരുടെ വ്യാജപ്രചാരണം.
നെറ്റ്ഫ്‌ലിക്‌സ് ഡോക്യുമെന്ററിയുമായി ബന്ധപ്പെട്ട പകപ്പര്‍വകാശ തര്‍ക്കത്തില്‍ നയന്‍താരയുടെ തുറന്ന കത്തിന് ധനുഷ് മറുപടി നല്കുമെന്ന് അഭിഭാഷകന്‍ കഴിഞ്ഞ ദിവസം പറഞ്ഞിരുന്നെങ്കിലും അതുണ്ടായില്ല. തന്റെ ഔദ്യോഗിക ഇന്‍സ്റ്റാഗ്രാം അക്കൗണ്ടില്‍ നിന്നാണ് നടനും സംവിധായകനും നിര്‍മാതാവുമായ ധനുഷിനുള്ള നയന്‍താര മൂന്ന് പേജുള്ള തുറന്ന കത്ത് പങ്കുവച്ചത്. ധനുഷിനെ കസ്തൂരിരാജയുടെ മകനെന്നും സെല്‍വരാഘവന്റെ സഹോദരനെന്നും അഭിസംബോധന ചെയ്താണ് കത്ത് ആരംഭിക്കുന്നത്. പ്രിവിലേജ് ഉള്ള ഒരു കുടുംബത്തില്‍ നിന്ന് എല്ലാവരുടെയും പിന്തുണയോടെ സിനിമയിലെത്തി സൂപ്പര്‍ താരമായ ഒരാളുടെ അവസ്ഥയല്ല സിനിമാ പശ്ചാത്തലമൊന്നുമില്ലാത്ത ഒരു സ്ത്രീ ഒറ്റക്ക് ഇന്നത്തെ നിലയില്‍ എത്തിയതെന്നും നയന്‍താര കത്തില്‍ പറയുന്നു. ധനുഷിന്റെ സ്വേച്ഛാധിപത്യ പ്രവണകള്‍ തമിഴ്‌നാട് അംഗീകരിക്കില്ലെന്നും അവര്‍ കത്തില്‍ പറഞ്ഞിരുന്നു.
നയന്‍താരയുടെ വിവാഹ ഡോക്യുമെന്ററിയില്‍ നാനും റൗഡി താന്‍ ചിത്രത്തിന്റെ മൂന്ന് സെക്കന്റുള്ള പിന്നണി ദൃശ്യങ്ങള്‍ ഉള്‍പ്പെടുത്തിയതാണ് വിവാദങ്ങള്‍ക്ക് തുടക്കം. താന്‍ നിര്‍മിച്ച സിനിമയുമായി ബന്ധപ്പെട്ട ദൃശ്യങ്ങള്‍ ഡോക്യുമെന്ററിയില്‍ നിന്ന് നീക്കണമെന്നും അല്ലെങ്കില്‍ 10 കോടി രൂപ നല്കണമെന്നും ആവശ്യപ്പെട്ട് ധനുഷ് വക്കീല്‍ നോട്ടീസയയ്‌ക്കുകയായിരുന്നു. പിന്നാലെയാണ് നയന്‍താര ധനുഷിനായി തുറന്ന കത്തെഴുതി ഇന്‍സ്റ്റഗ്രാമില്‍ പങ്കുവച്ചത്.
ധനുഷിന്റെ പ്രവൃത്തി തന്റെ ഹൃദയം തകര്‍ത്തുവെന്ന് നയന്‍താര കത്തില്‍ പറഞ്ഞു. നടിയുടെ ജന്മദിനമായ ഇന്ന്, നയന്‍താര: ബിയോണ്ട് ദ ഫെയ്‌റി ടെയ്ല്‍ എന്ന ഡോക്യുമെന്ററി നെറ്റ്~ിക്‌സ് സംപ്രേഷണം ചെയ്യും.
പ്രതികരിക്കാൻ ഇവിടെ എഴുതുക