പുരി : ഒഡീഷയിൽ ട്രെയിന് നേരെ വെടിവയ്പ്പ്. പുരി-ന്യൂഡൽഹി നന്ദൻ കാനൻ എക്‌സ്പ്രസിന് നേരെയാണ് അജ്ഞാതർ വെടിയുതിർത്തത് . ഒപ്പം ലോഹ വസ്തുക്കൾ എറിയുകയും ചെയ്തു. ഇന്ന് രാവിലെ 9 നും 9.30 നും ഇടയിൽ ഒഡീഷയിലെ ഭദ്രക് റെയിൽവേ സ്റ്റേഷനിലൂടെ ട്രെയിൻ കടന്നുപോകുമ്പോഴാണ് സംഭവം. സംഭവത്തിൽ ആർക്കും പരിക്കുകളൊന്നും റിപ്പോർട്ട് ചെയ്തിട്ടില്ല . കോച്ച് ടോയ്‌ലറ്റിന്റെ ജനൽ പാളിയിൽ രണ്ട് വെടിയുണ്ടകൾ പതിക്കുകയായിരുന്നു.
യാത്രക്കാരുടെ സുരക്ഷ ഉറപ്പാക്കാൻ ജിആർപിയും ആർപിഎഫും എത്തി. സംഭവത്തിന്റെ അന്വേഷണത്തിനായി ആർപിഎഫും പോലീസും ഉൾപ്പെടെ 4 ടീമുകളെ നിയോഗിച്ചതായി റെയിൽ വേ അധികൃതർ പറഞ്ഞു.ഉടൻ തന്നെ ട്രെയിൻ ലോക്കോപൈലറ്റ് മുതിർന്ന റെയിൽവേ ഉദ്യോഗസ്ഥരെ വിവരമറിയിച്ചു. “ഭദ്രക് സ്റ്റേഷന്റെ ട്രാഫിക് ഗേറ്റിൽ ട്രെയിൻ സിഗ്നൽ മാറ്റുന്നതിനിടയിൽ വലിയ ശബ്ദവും കോച്ചിൽ എന്തോ ഇടിക്കുന്ന ശബ്ദവും ആദ്യം കേട്ടു. ട്രെയിനിനുനേരെ കല്ലേറുണ്ടായതാണ് കാരണമെന്ന് കരുതി. പക്ഷേ, ഞാൻ വാതിലിനടുത്തെത്തിയപ്പോൾ, ഒരാൾ പിസ്റ്റൾ പിടിച്ച് നിൽക്കുന്നത് ഞാൻ കണ്ടു, ”ദൃക്സാക്ഷികളിൽ ഒരാൾ പറഞ്ഞു.
പ്രതികരിക്കാൻ ഇവിടെ എഴുതുക: