അന്തർസംസ്ഥാന ആയുധക്കടത്ത് സംഘത്തെ പിടികൂടി പഞ്ചാബ് പോലീസ് ; ഏഴ് പേർ അറസ്റ്റിൽ

ചണ്ഡീഗഡ് : പഞ്ചാബിൽ അന്തർസംസ്ഥാന ആയുധക്കടത്ത് ശ്രംഖല തകർത്ത് പോലീസ്. സംഭവവുമായി ബന്ധപ്പെട്ട് ഏഴ് പേരെ പിടികൂടിയതായി പഞ്ചാബ് പോലീസ് ഡയറക്ടർ ജനറൽ ഗൗരവ് യാദവ് അറിയിച്ചു.

പിടികൂടിയവരിൽ നിന്നും 12 പിസ്റ്റളുകളും 16 മാഗസിനുകളും 23 വെടിയുണ്ടകളും പിടിച്ചെടുത്തു. മധ്യപ്രദേശിൽ നിന്ന് ആയുധങ്ങൾ വാങ്ങുന്ന ഇവർ വിവിധ അക്രമി സംഘങ്ങൾക്ക് മറിച്ച് വിൽക്കുന്നുണ്ടെന്ന് പ്രാഥമിക അന്വേഷണത്തിൽ കണ്ടെത്തിയതായി ഉദ്യോഗസ്ഥൻ അറിയിച്ചു.

സംഭവവുമായി ബന്ധപ്പെട്ട് അമൃത്‌സറിലെ പോലീസ് സ്‌റ്റേഷനിൽ എഫ്ഐആർ രജിസ്റ്റർ ചെയ്തിട്ടുണ്ട്. ഈ സംഘത്തിൽ ഉൾപ്പെട്ട മറ്റുള്ളവരെ കണ്ടെത്താൻ സമഗ്രമായ അന്വേഷണം തുടരുകയാണെന്നും ഡിജിപി പറഞ്ഞു.

ഇതിനു പുറമെ സംഘടിത കുറ്റകൃത്യങ്ങൾക്കും അനധികൃത ആയുധക്കടത്തിനും എതിരെ കർശന നടപടിയെടുക്കാൻ പഞ്ചാബ് പോലീസ് പ്രതിജ്ഞാബദ്ധമാണെന്നും ശൃംഖലയ്‌ക്കുള്ളിലെ എല്ലാ അക്രമികളെയും നിയമത്തിന് മുന്നിൽ കൊണ്ടുവരാൻ പ്രവർത്തിക്കുന്നുണ്ടെന്നും അദ്ദേഹം കൂട്ടിച്ചേർത്തു.