കണ്ണൂര്: എഡിഎം നവീന് ബാബു ജീവനൊടുക്കിയതിന് പിന്നാലെ ഒളിവില് പോയ കണ്ണൂര് ജില്ലാ പഞ്ചായത്ത് മുന് പ്രസിഡന്റ് പി.പി.ദിവ്യ അമിത രക്തസമ്മർദ്ദത്തെ തുടർന്ന് ആശുപത്രിയില് ചികിത്സ തേടി. കഴിഞ്ഞ ദിവസം രാത്രി പയ്യന്നൂര് സഹകരണ ആശുപത്രിയിലാണ് ദിവ്യ ചികിത്സ തേടിയത്. അരമണിക്കൂറിന് ശേഷം ഇവിടം വിടുകയും ചെയ്തു. ആശുപത്രിക്ക് സമീപം ചില പോലീസ് ഉദ്യോഗസ്ഥർ ഉണ്ടായിരുന്നുവെന്നും വിവരമുണ്ട്.
എന്നാൽ ദിവ്യ ചികിത്സ തേടിയ വിവരം ആശുപത്രി അധികൃതർ നിഷേധിച്ചിട്ടുണ്ട്. ദിവ്യയുടെ മുന്കൂര് ജാമ്യാപേക്ഷയില് ഇന്ന് കോടതി വിധി പറയാനിരിക്കെയാണ് ഇവര് ആശുപത്രിയിലെത്തിയത്. പ്രിന്സിപ്പല് സെഷന്സ് കോടതി ജഡ്ജ് നിസാര് അഹമ്മദാണ് വിധി പറയുക. നവീന് ബാബു ജീവനൊടുക്കിയ സംഭവത്തില് ദിവ്യയ്ക്കെതിരെ ആത്മഹത്യാപ്രേരണാ കുറ്റം ചുമത്തി കേസെടുത്തിരുന്നു. തുടര്ന്ന് മുന്കൂര് ജാമ്യത്തിനായി ദിവ്യ കോടതിയെ സമീപിക്കുകയായിരുന്നു.
കോടതി ജാമ്യാപേക്ഷ തള്ളിയാൽ ദിവ്യ അന്വേഷണ സംഘത്തിന് മുന്നിൽ കീഴടങ്ങുമെന്നാണ് സൂചന.
