സുല്‍ത്താന്‍ ജോഹര്‍ കപ്പ് ഹോക്കി: ഭാരതം നാളെ മലേഷ്യക്കെതിരെ

ജോഹര്‍ ബഹ്‌റു: സുല്‍ത്താന്‍ ജോഹര്‍ കപ്പ് ഹോക്കി ചാമ്പ്യന്‍ഷിപ്പില്‍ ഭാരതം നാളെ ആതിഥേയരായ മലേഷ്യയെ നേരിടും. ആദ്യ മത്സരത്തില്‍ ജപ്പാനെയും ഞായറാഴ്ച കരുത്തരായ ബ്രിട്ടനെയും തകര്‍ത്തതിന്റെ ആത്മവിശ്വാസത്തിലാണ് ഭാരതം നാളെ മലേഷ്യക്കെതിരെ കളിക്കാനിറങ്ങുന്നത്.

ആദ്യ കളിയില്‍ ജപ്പാനെ 4-2ന് പരാജയപ്പെടുത്തി തുടങ്ങിയ ഭാരതം രണ്ടാം കളിയില്‍ നാലിനെതിരെ ആറ് ഗോളുകള്‍ക്കാണ് ഇഗഗ്ലണ്ടിനെ തകര്‍ത്തത്. ആദ്യം രണ്ട് ഗോളുകള്‍ക്ക് പിന്നിട്ടുനിന്ന ശേഷമാണ് പി.ആര്‍. ശ്രീജേഷിന്റെ ശിക്ഷണത്തിലിറങ്ങിയ ഭാരത യുവനിര വിജയം സ്വന്തമാക്കിയത്. ഭാരതത്തിനായി ദില്‍രാജ് സിങും ഷര്‍ദാനന്ദ് തിവാരിയും രണ്ട് ഗോള്‍ വീതം നേടി. 17, 50 മിനിറ്റുകളിലായിരുന്നു ദില്‍രാജിന്റെ ഗോളുകള്‍. ഷര്‍ദാനന്ദ് 20, 50 മിനിറ്റുകിലാണ് ഗോളടിച്ചത്. ഇവര്‍ക്ക് പുറമെ ഏഴാം മിനിറ്റില്‍ മുഹമ്മദ് കൊനെയ്ന്‍ ഡാഡും 26-ാം മിനിറ്റില്‍ മന്‍മീത് സിങ്ങുമാണ് ഓരോ ഗോള്‍ വീതം നേടിയത്. ഇംഗ്ലണ്ടിനായി 2, 15 മിനിറ്റുകളില്‍ റോറി പെന്റോസും 46, 59 മിനിറ്റുകില്‍ മൈക്കല്‍ റോയ്ഡനുമാണ് ഗോളടിച്ചത്.