പഴയങ്ങാടി (കണ്ണൂര്): സിപിഎം ക്രിമിനലിസത്തിന്റെ തനത് ഉത്പന്നമാണ് പി.പി. ദിവ്യയെന്ന് ബിജെപി ദേശീയ ഉപാധ്യക്ഷന് എ.പി. അബ്ദുള്ളക്കുട്ടി. കണ്ണൂര് എഡിഎം നവിന്ബാബു ആത്മഹത്യ ചെയ്ത സംഭവത്തില് പ്രതിഷേധിച്ച് ജില്ലാ പഞ്ചായത്ത് പ്രസിഡന്റ് പി.പി. ദിവ്യയുടെ ഇരിണാവിലെ വീട്ടിലേക്ക് ബിജെപി കല്ല്യാശേരി മണ്ഡലം കമ്മിറ്റി സംഘടിപ്പിച്ച പ്രതിഷേധമാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം.
ജില്ലാ കളക്ടര് വിളിച്ച് ചേര്ത്ത എഡിഎം നവീന് ബാബുവിന്റെ ഔദ്യോഗിക യാത്രയയപ്പ് ചടങ്ങില് അതിക്രമിച്ച് കയറി മരണദൂതുമായെത്തിയ ദിവ്യയെ അറസ്റ്റ് ചെയ്ത് കൊലപാതക ശ്രമത്തിന് കേസെടുക്കണമെന്ന് അദ്ദേഹം ആവശ്യപെട്ടു. ന്യായികരണത്തൊഴിലാളികളുമായി ഇറങ്ങി പി.പി. ദിവ്യ എന്ന കാളകൂടവിഷത്തെ രക്ഷിക്കാമെന്നുള്ളത് ജയരാജന്മാരുടെ ദിവാസ്വപ്നമാണെന്നും ജില്ലാ പഞ്ചായത്ത് പ്രസിഡന്റായ ദിവ്യ എന്ന സാമൂഹ്യ വിപത്തിനെ കൈയാമം വയ്ക്കും വരെ ശക്തമായ പ്രക്ഷോഭ പരിപാടികളുമായി ബിജെപി രംഗത്ത് ഉണ്ടാവുമെന്നും അബ്ദുള്ളക്കുട്ടി പറഞ്ഞു.
പി.പി. ദിവ്യയുടെയും ഭര്ത്താവിന്റെയും ബിനാമി ഇടപാടുകളെ കുറിച്ച് ശക്തമായ അന്വേഷണം വേണമെന്നും അദ്ദേഹം ആവശ്യപ്പെട്ടു. ബിജെപി ജില്ലാ പ്രസിഡന്റ് എന്. ഹരിദാസ് അധ്യക്ഷത വഹിച്ചു. ബിജെപി ദേശീയ നിര്വാഹക സമിതി അംഗം സി. രഘുനാഥ്, സംസ്ഥാന സെക്രട്ടറി കെ. രഞ്ജിത്ത്, ജില്ലാ ജനറല് സെക്രട്ടറിമാരായ എം.ആര്. സുരേഷ്, ബിജു ഏളക്കുഴി, രമേശന് ചെങ്കുനി തുടങ്ങിയവര് സംസാരിച്ചു. മാര്ച്ച് കണ്ണപുരം ഇരിണാവ് റോഡില് വച്ച് പോലിസ് തടഞ്ഞു.
ബിജെപിയും യൂത്ത് കോണ്ഗ്രസും വീട്ടിലേക്ക് പ്രതിഷേധമാര്ച്ച് നടത്തുമെന്ന് പ്രഖ്യാപിച്ചിരുന്നതിനാല് രാവിലെ മുതല് സിപിഎം പ്രവര്ത്തകര് ദിവ്യയുടെ വീടിന് സംരക്ഷണമൊരുക്കാന് എത്തിയിരുന്നു.
