തിരുവനന്തപുരം: സ്‌കൂള്‍ കലോത്സവങ്ങള്‍ക്ക് അരങ്ങുണര്‍ന്നതോടെ നൃത്തയിനങ്ങള്‍ക്കുള്ള ചെലവ് താങ്ങാനാവാതെ രക്ഷിതാക്കള്‍.
അധ്യാപകരുടെ ഫീസ് മുതല്‍ മേക്കപ്പ് സാധനങ്ങളുടെ വരെയുള്ള ചെലവ് കഴിഞ്ഞ വര്‍ഷത്തിലധികം ഇരട്ടിയിലധികമായി. ഒന്നിലധികം ഐറ്റങ്ങളില്‍ പങ്കെടുക്കേണ്ടവര്‍ പെടാപ്പാടുപെടും. മൊത്തത്തില്‍ വിപണിയിലുണ്ടായ വിലക്കയറ്റം നൃത്തമേഖലയിലുമുണ്ട്. ഒരു ഐറ്റം വേദിയിലെത്തണമെങ്കില്‍ മിനിമം 2 ലക്ഷത്തിന് മുകളിലാവും. ഒന്നിലേറെ മത്സരങ്ങളുണ്ടെങ്കില്‍ പറയുകയും വേണ്ട.
ഒരു വശത്ത് കാശുള്ളവര്‍ അരങ്ങ് കൊഴുപ്പിക്കുമ്പോള്‍ കലയോടുള്ള ആഗ്രഹം കൊണ്ട് മാത്രം ഒപ്പമെത്താന്‍ പെടാപ്പാടുപെടുന്ന ഒരുപാട് കുട്ടികളും രക്ഷിതാക്കളുമുണ്ട്. കഴിവുള്ള മക്കളെ അരങ്ങിലെത്തിക്കാന്‍ കടംവാങ്ങിയും പണയം വച്ചും എത്തുന്നവരും അനവധിയാണ്. ഒരാള്‍ക്ക് മൂന്ന് സിംഗിള്‍ ഇനങ്ങളില്‍ മത്സരിക്കാം. അപ്പോഴേയ്‌ക്കും ചെലവ് മിനിമം ആറ് ലക്ഷമാകും.
മേക്കപ്പിന് മൂവായിരമാണ് മിനിമം ചാര്‍ജ്. ആര്‍ട്ടിസ്റ്റുകളുടെ പ്രശസ്തി കൂടും തോറും ഫീസും ഉയരും. പത്ത് മിനിറ്റുള്ള ഒരു ഐറ്റത്തിന് മിനിമം 30,000 രൂപയാണ് അധ്യാപകരുടെ ഫീസ്. ആഭരണങ്ങളും വസ്ത്രങ്ങളും സ്വന്തമായി വാങ്ങുന്നവരും വാടകയ്‌ക്ക് എടുക്കുന്നവരുമുണ്ട്. വസ്ത്രങ്ങളുടെ തയ്യല്‍ക്കൂലിയും വാടകയും അമ്പത് ശതമാനത്തിലേറെ ഉയര്‍ന്നു. സ്‌റ്റേജിലെ അവതരണം മാത്രമല്ല, മേക്കപ്പിന്റെയും വസ്ത്രത്തിന്റെയും പകിട്ടും തിളക്കവുമെല്ലാം മാര്‍ക്കിനെ സ്വാധീനിക്കും. അതുകൊണ്ട് പരമാവധി തിളക്കവും മേന്മയുള്ളവയാണ് എല്ലാവരും തിരഞ്ഞെടുക്കുക.
പട്ടുവസ്ത്രത്തിന് മിനിമം 8000, തയ്യല്‍ക്കൂലി 3500
വാടകയ്‌ക്ക് എടുത്താലും അയ്യായിരം രൂപ വരെ ചെലവ്
ആഭരണങ്ങള്‍ക്ക് വാടക 1500 വരെ,
ആഭരണങ്ങള്‍ വാങ്ങിയാല്‍ 10,000 മുതല്‍
ടെമ്പിള്‍ വര്‍ക്കും കല്ലുകൊണ്ടുള്ള ആഭരണങ്ങള്‍ക്കും ഡിമാന്‍ഡ്
പ്രതികരിക്കാൻ ഇവിടെ എഴുതുക: