കൊച്ചി: ദേശീയ തലത്തില് കാഴ്ച പരിമിതര്ക്കായി സംഘടിപ്പിച്ചുവരുന്ന നാഗേഷ് ട്രോഫി ക്രിക്കറ്റിനുള്ള 17 അംഗ കേരള ടീമിനെ പ്രഖ്യാപിച്ചു. ഡിസംബര് ഒമ്പത് മുതല് 13 വരെ ബംഗളൂരുവിലാണ് ഇത്തവണത്തെ നാഗേഷ് ട്രോഫി.
കഴിഞ്ഞ 19 മുതല് 22 വരെ നടന്ന സെലക്ഷന് ട്രയല്സില് നിന്നാണ് കേരള ടീമിനെ പ്രഖ്യാപിച്ചിരിക്കുന്നത്. അനന്തു ശശികുമാര് നയിക്കുന്ന ടീമില് വേണുഗോപാല് എം, സുധീഷ് വി കെ, ബിനീഷ് എ വി, ശിവകുമാര് കെ, അബിന് അരവിന്ദ്, മനീഷ് എ, അബ്ദുല് മുനസ് കെ, മുഹമ്മദ് കമല്, മുഹമ്മദ് ഫര്ഹാന് എ, അഹദ് പി പി, സദക്കത്തുല് അന്വര് സി കെ, വിഷ്ണു എന് കെ, സുജിത് എം എസ്, ഷൈലജ് എസ്, മുഹമ്മദ് ഷിംലാദ്, സച്ചിന് തുളസീധരന് എന്നിവരെയാണ് ഉള്പ്പെടുത്തിയിരിക്കുന്നത്. 30 പേര് സെലക്ഷന് ട്രയല്സില് പങ്കെടുത്തിരുന്നു.
കേരള ക്രിക്കറ്റ് അസോസിയേഷന് സീനിയര് കോച്ചായ റോബിന് മേനോനാണ് മുഖ്യ പരിശീലകന്. ഭാരത ബ്ലൈന്ഡ് ക്രിക്കറ്റ് ടീമംഗമായിരുന്ന അജേഷ് എ യെ സഹപരിശീലകനായി നിയമിച്ചതായി ക്രിക്കറ്റ് അസോസിയേഷന് ഫോര് ദി ബ്ലൈന്ഡ് ഇന് കേരള ചെയര്മാന് രജനീഷ് ഹെന്റി അറിയിച്ചു. നാഗേഷ് ട്രോഫിയില് കര്ണാടക, ദല്ഹി, തമിഴ്നാട്, ഹിമാചല് പ്രദേശ് എന്നിവരടങ്ങുന്ന ഗ്രൂപ്പ് എയിലാണ് കേരളം കളിക്കുന്നത്.
