തിരുവനന്തപുരം: മുഖ്യമന്ത്രിയുടെ മലപ്പുറം പരാമര്ശം, പി.വി. അന്വറിന്റെ ഫോണ് ചോര്ത്തല് ആരോപണം എന്നിവയില് ഇന്നലെ നേരിട്ടെത്തി വിശദീകരണം നല്കണമെന്ന് ചീഫ് സെക്രട്ടറിയോടും ഡിജിപിയോടും ഗവര്ണര് ആവശ്യപ്പെട്ടിരുന്നെങ്കിലും ഇരുവരും ഹാജരായില്ല. ഗവര്ണറുടെ നിര്ദേശം അംഗീകരിക്കേണ്ടതില്ലെന്ന് സര്ക്കാര് നിലപാടെടുത്തതോടെയാണ് ഉദ്യോഗസ്ഥര് ഹാജരാകാതിരുന്നത്. സര്ക്കാരിനെ അറിയിക്കാതെ ഗവര്ണര്ക്ക് ഉദ്യോഗസ്ഥരെ വിളിച്ചുവരുത്താന് അധികാരമില്ലെന്നു കാട്ടി ഇന്നലെ രാവിലെ മുഖ്യമന്ത്രി ഗവര്ണര്ക്ക് കത്തു നല്കി.
ഇതിനു മറുപടിയായി ഭരണഘടനാ ബാധ്യതയനുസരിച്ചാണ് താന് കത്ത് നല്കിയതെന്നും ഉദ്യോഗസ്ഥര് ഹാജരാകണമെന്നും ചൂണ്ടിക്കാട്ടി ഗവര്ണര് വൈകിട്ടു വീണ്ടും മുഖ്യമന്ത്രിക്ക് കത്തു നല്കി. ഉദ്യോഗസ്ഥരെ ഹാജരാകുന്നതില് നിന്നു വിലക്കിയ മുഖ്യമന്ത്രി എന്തോ ഒളിക്കുന്നുണ്ടെന്നും ഗവര്ണര് കത്തില് വിമര്ശിച്ചു.
ചീഫ് സെക്രട്ടറിയും ഡിജിപിയും ഇന്നലെ വൈകിട്ട് 4ന് രാജ്ഭവനില് നേരിട്ടെത്തി വിശദീകരണം നല്കണമെന്നായിരുന്നു ഗവര്ണര് ആവശ്യപ്പെട്ടത്. ഡിജിപി ഷെയ്ഖ് ദര്വേഷ് സാഹിബിനെയും കൂട്ടിയെത്താനാണ് ചീഫ് സെക്രട്ടറി ശാരദ മുരളീധരനോട് കത്തില് ഗവര്ണര് ആവശ്യപ്പെട്ടത്.
മലപ്പുറത്തെ സ്വര്ണക്കടത്ത്, ഹവാല ഇടപാടുകളിലെ പണം ദേശ ദ്രോഹ പ്രവര്ത്തനങ്ങള്ക്ക് ഉപയോഗിക്കുന്നെന്ന മുഖ്യമന്ത്രിയുടെ പരാമര്ശമാണ് ഗവര്ണര് ഇടപെടാനിടയാക്കിയത്. പി.വി. അന്വറിന്റെ ഫോണ് ചോര്ത്തല് ആരോപണവും വിഷയമായിരുന്നു. ഇരു വിഷയത്തിലും ഗവര്ണര് സര്ക്കാരിനോടും റിപ്പോര്ട്ട് ആവശ്യപ്പെട്ടിരുന്നെങ്കിലും നല്കിയില്ല. ഫോണ് ചോര്ത്തല് വിഷയത്തില് അടിയന്തര റിപ്പോര്ട്ട് തേടി മൂന്നാഴ്ച മുമ്പാണ് ഗവര്ണര് സര്ക്കാരിന് കത്തു നല്കിയത്. മലപ്പുറം പരാമര്ശത്തില് നാലു ദിവസം മുമ്പാണ് മുഖ്യമന്ത്രിക്കു ഗവര്ണര് കത്തയച്ചത്.
ഇതിനും മറുപടി നല്കിയിരുന്നില്ല. ഈ സാഹചര്യത്തിലാണ് ഉദ്യോഗസ്ഥരോട് ഹാജരാകാന് ഗവര്ണര് നിര്ദേശിച്ചത്. എന്നാല് ഗവര്ണറുടെ നടപടി ചട്ടവിരുദ്ധമെന്ന് ചൂണ്ടിക്കാട്ടി മുഖ്യമന്ത്രി ഗവര്ണര്ക്കു കത്തു നല്കിയത്. ഇതിനു മറുപടിയായി ഗവര്ണര് മുഖ്യമന്ത്രിക്കു വീണ്ടും കത്തു നല്കി.
