തിരുവമ്പാടി: കോഴിക്കോട് തിരുവമ്പാടി കാളിയമ്പുഴയില് നിരവധി യാത്രക്കാരുമായി പോയ കെഎസ്ആര്ടിസി ബസ് നിയന്ത്രണംവിട്ട് പുഴയിലേക്ക് മറിഞ്ഞുണ്ടായ അപകടത്തില് രണ്ടു പേർ മരിച്ചു. നിരവധി പേര്ക്ക് പരിക്കേറ്റിട്ടുണ്ട്. രണ്ടു പേരുടെ നില അതീവ ഗുരുതരമാണ്.
മുണ്ടൂർ സ്വദേശി കമലയാണ് മരിച്ചവരിൽ ഒരാൾ. മറ്റേയാളെ തിരിച്ചറിഞ്ഞിട്ടില്ല. ഏറെ നേരത്തെ പരിശ്രമത്തിനൊടുവിൽ ബസ് പുഴയിൽ നിന്നും പൂർണമായും ഉയർത്തി. മുത്തപ്പന് പുഴയില്നിന്ന് തിരുവമ്പാടിയിലേക്ക് പോകുകയായിരുന്ന ബസ് കലുങ്കിലിടിച്ച് നിയന്ത്രണംവിട്ട് മറിയുകയായിരുന്നു. ഉച്ചയ്യ്ക്ക് രണ്ടു മണിയോടെയാണ് അപകടം ഉണ്ടായത്. അമ്പതോളം ആളുകൾ ബസിലുണ്ടായിരുന്നു.
പരിക്കേറ്റവരെ കോഴിക്കോട് മെഡിക്കൽ കോളേജ് ഉൾപ്പടെയുള്ള ആശുപത്രികളിൽ പ്രവേശിപ്പിച്ചു. ആരെങ്കിലും പുഴയിൽ അകപ്പെട്ടിട്ടുണ്ടോ എന്ന് പരിശോധിക്കുന്നതിനായി അഗ്നിശമന സേന പരിശോധന നടത്തുകയാണ്.
