കൊൽക്കത്ത : പശ്ചിമ ബംഗാൾ ബിർഭൂമിലെ കൽക്കരി ഖനിയിൽ സ്ഫോടനം . 7 തൊഴിലാളികൾ മരിച്ചു. നിരവധി തൊഴിലാളികൾക്ക് പരിക്കേറ്റു. ഇന്ന് പുലർച്ചെയാണ് സംഭവം.
ഖോയ്റഷോളിലെ വഡൂലിയയിലെ ഗംഗാറാംചക് കൽക്കരി ഖനിയിലാണ് സ്ഫോടനമുണ്ടായത്. ആദ്യം ഖനിക്കുള്ളിൽ നിന്ന് 5 മൃതദേഹങ്ങൾ കണ്ടെടുത്തു. പിന്നീട് രണ്ട് മരണം കൂടി റിപ്പോർട്ട് ചെയ്തു. നിരവധി പേർ ഖനിക്കുള്ളിൽ കുടുങ്ങിക്കിടക്കുന്നതായി സംശയിക്കുന്നു. രക്ഷാപ്രവർത്തനം പുരോഗമിക്കുകയാണ്.
ഖനിയിൽ നിന്ന് കൽക്കരി വേർതിരിച്ചെടുക്കാനുള്ള ശ്രമത്തിനിടെയാണ് സ്ഫോടനം നടന്നതെന്ന് ദൃക്സാക്ഷികൾ പറഞ്ഞു.സംഭവത്തിന് ശേഷം ഖനിയിലെ ഉന്നത ഉദ്യോഗസ്ഥർ അവിടെ നിന്ന് ഓടിപ്പോയെന്നാണ് ആരോപണം. പ്രദേശത്ത് ഇപ്പോൾ സംഘർഷാവസ്ഥ നിലനിൽക്കുന്നുണ്ട്. വൻ പോലീസ് സേനയെ ഇവിടെ വിന്യസിച്ചിട്ടുണ്ട്. പരിക്കേറ്റ എല്ലാവരെയും പ്രാദേശിക ആശുപത്രികളിൽ പ്രവേശിപ്പിച്ചിരിക്കുകയാണ്. എല്ലാവരെയും സുരക്ഷിതമായി പുറത്തെത്തിക്കാനാണ് ശ്രമിക്കുന്നതെന്ന് പോലീസ് പറഞ്ഞു.
