ഷാര്ജ: ട്വന്റി20 വനിതാ ലോകകപ്പ് ക്രിക്കറ്റില് ആദ്യ മത്സരത്തിനിറങ്ങിയ നിലവിലെ ജേതാക്കളായ ഓസ്ട്രേലിയ തകര്പ്പന് ജയം സ്വന്തമാക്കി. രണ്ടാം മത്സരത്തിനിറങ്ങിയ ശ്രീലങ്കയെ ആറ് വിക്കറ്റിനാണ് അലീസിയ ഹീലിയും സംഘവും തോല്പ്പിച്ചത്. ലോകകപ്പിലെ ആദ്യ പോരാട്ടത്തില് പാകിസ്ഥാനോട് ശ്രീലങ്ക പരാജയപ്പെട്ടിരുന്നു.
ടോസ് നേടി ആദ്യം ബാറ്റ് ചെയ്ത ശ്രീലങ്ക 20 ഓവറില് ഏഴ് വിക്കറ്റ് നഷ്ടത്തില് 93 റണ്സാണെടുത്തത്. ഇതിനെതിരെ ബാറ്റ് ചെയ്ത ഓസ്ട്രേലിയ 14.2 ഓവറില് നാല് വിക്കറ്റ് നഷ്ടത്തില് ലക്ഷ്യം കണ്ടു. 43 റണ്സുമായി പുറത്താകാതെ നിന്ന ഓപ്പണര് ബെത്ത് മൂണി ഓസീസിനെ വിജയത്തിലേക്ക് നയിച്ചു. നേരത്തെ പേസ് ബൗളര് മേഗന് സ്കട്ട് ആണ് ലങ്കന് ബാറ്റിങ് നിരയെ എറിഞ്ഞു തകര്ക്കാന് മുന്നില് നിന്നത്. നാല് ഓവറില് 12 റണ്സ് മാത്രം വഴങ്ങി മൂന്ന് വിക്കറ്റ് നേടിയ സ്കട്ട് കളിയിലെ താരമായി.
