ഉദയ്പൂരിൽ പുലിയുടെ ആക്രമണത്തിൽ ക്ഷേത്ര പൂജാരി കൊല്ലപ്പെട്ടു ; മൃതദേഹം കണ്ടെത്തിയത് വനത്തിനുള്ളിൽ

ഉദയ്പൂർ: രാജസ്ഥാനിൽ പുള്ളിപ്പുലിയുടെ ആക്രമണത്തിൽ ക്ഷേത്ര പൂജാരി കൊല്ലപ്പെട്ടു. ഇന്നലെ രാവിലെ ഗോഗുണ്ടയിലാണ് സംഭവം.

ഗോഗുണ്ടയിലെ റാത്തോഡോ കാ ഗുധ പ്രദേശത്ത് ക്ഷേത്രത്തിന് പുറത്ത് ഉറങ്ങുകയായിരുന്ന വിഷ്ണു ഗിരിയെന്ന പൂജാരിയെ ആക്രമിച്ച വന്യമൃഗം വനത്തിലേക്ക് വലിച്ചിഴച്ച് കൊണ്ടുപോകുകയും കൊല്ലുകയുമായിരുന്നു. തിങ്കളാഴ്ച രാവിലെ ക്ഷേത്രത്തിൽ നിന്ന് 150 മീറ്റർ അകലെ നിന്നുമാണ് വികൃതമായ നിലയിൽ മൃതദേഹം ലഭിച്ചതെന്ന് പോലീസ് പറഞ്ഞു.

അതേ സമയം പൂജാരിയെ പുള്ളിപ്പുലിയാണോ മറ്റെന്തെങ്കിലും മൃഗമാണോ ആക്രമിച്ചതെന്ന് കണ്ടെത്താൻ അന്വേഷണം നടക്കുകയാണെന്ന് വനപാലകർ പറഞ്ഞു. കഴിഞ്ഞ കുറച്ച് ദിവസങ്ങളായി ഒന്നിലധികം പുള്ളിപ്പുലി ആക്രമണത്തെ തുടർന്ന് ഗോഗുണ്ട ഭീതിയിലാണ്. വന്യ മൃഗങ്ങളുടെ ആക്രമണങ്ങളിൽ ഇവിടെ ഇതുവരെ അഞ്ച് പേർ കൊല്ലപ്പെട്ടിട്ടുണ്ട്.