ശ്രീനഗര്: നല്ല ബന്ധത്തിലായിരുന്നെങ്കില് അന്താരാഷ്ട്ര നാണ്യ നിധിയില് (ഐഎംഎഫ്) നിന്നും പാകിസ്ഥാന് ലഭിക്കുന്നതിലും അധിക തുക ഭാരതം നല്കുമായിരുന്നുവെന്ന് പ്രതിരോധമന്ത്രി രാജ്നാഥ് സിങ്. ഭാരതവുമായി ശത്രുത നിലനിര്ത്താനാണ് പാകിസ്ഥാന് ആഗ്രഹിക്കുന്നത്. എന്നാല് നല്ല ബന്ധം സ്ഥാപിക്കുകയാണെങ്കില് പാകിസ്ഥാന് ഭാരതം സഹായ ഹസ്തം നീട്ടുമായിരുന്നുവെന്നും ജമ്മു കശ്മീരിലെ ബന്ദിപ്പോറയില് സംഘടിപ്പിച്ച തെരഞ്ഞെടുപ്പ് റാലിയില് അദ്ദേഹം പറഞ്ഞു.
പാകിസ്ഥാനി സുഹൃത്തുക്കളെ… നിങ്ങള് എന്തിനാണ് ഭാരതവുമായുള്ള ബന്ധം വളഷാക്കിയത്. നല്ല സൗഹൃദത്തിലായിരുന്നുവെങ്കില് ഐഎംഎഫിനോട് നിങ്ങള് ആവശ്യപ്പെടുന്നതിലും കൂടുതല് തുക ഭാരതം നല്കുമായിരുന്നു. എന്നാല് നിങ്ങള് ഭാരതത്തെ ദ്രോഹിക്കാനാണ് ശ്രമിച്ചത്. അത് വച്ചുപൊറുപ്പിക്കാനാവില്ല, അദ്ദേഹം കൂട്ടിച്ചേര്ത്തു.
കശ്മീരിന്റെ വികസന പ്രവര്ത്തനങ്ങള്ക്കായി 2014-2015ല് പ്രധാനമന്ത്രി നരേന്ദ്ര മോദി 90,000 കോടി രൂപ അനുവദിച്ചിരുന്നു. ഐഎംഎഫില് നിന്ന് പാകിസ്ഥാന് ആവശ്യപ്പെട്ടതിനെക്കാള് അധിക തുകയാണിത്. എന്നാല് ഐഎംഎഫ് അനുവദിച്ച പണം വികസന പ്രവര്ത്തനങ്ങള്ക്കോ ജനങ്ങള്ക്കോ വേണ്ടി ഉപയോഗിക്കാതെ ഭീകരവാദ പ്രവര്ത്തനങ്ങള്ക്കായി പാകിസ്ഥാന് ദുരുപയോഗം ചെയ്യുകയാണെന്നും രാജ്നാഥ് സിങ് ചൂണ്ടിക്കാട്ടി.
