ശ്രീനഗർ: ജമ്മു കശ്മീരിലെ കത്വ ജില്ലയിൽ സുരക്ഷാ സേനയും ഭീകരരും തമ്മിലുണ്ടായ ഏറ്റുമുട്ടലിനിടെ പോലീസ് ഉദ്യോഗസ്ഥന് വീരമൃത്യു. ഏറ്റുമുട്ടലിൽ രണ്ട് ഭീകരരെ സുരക്ഷാ സേന വധിച്ചു. ശനിയാഴ്ച വൈകിട്ടുണ്ടായ ഏറ്റുമുട്ടലിൽ ജമ്മു കശ്മീർ പോലീസ് സേനയിലെ ഹെഡ് കോൺസ്റ്റബിൾ ബഷീർ അഹമ്മദാണ് കൊല്ലപ്പെട്ടത്. പോലീസ് സേനയിലെ ഒരു അസിസ്റ്റന്റ് സബ് ഇൻസ്പെക്ടർക്ക് പരുക്കേറ്റതായും അധികൃതർ അറിയിച്ചു.
മേഖലയിൽ ഇപ്പോഴും ഏറ്റുമുട്ടൽ തുടരുകയാണ്. പ്രദേശത്ത് സുരക്ഷാ സേനകൾ സംയുക്തമായി തിരച്ചിൽ ആരംഭിച്ചു. കത്വ ജില്ലയിലെ കോഗ് – മണ്ഡലി ഗ്രാമത്തിൽ വച്ചായിരുന്നു സംഭവം. ഗ്രാമത്തിലെ ഒരു വീടിനുള്ളിൽ ഭീകരർ ഒളിച്ചിരിക്കുന്നുണ്ടെന്ന രഹസ്യ വിവരത്തെത്തുടർന്നാണ് സുരക്ഷാ സേന തെരച്ചിൽ നടത്തുകയായിരുന്നു. തുടർന്ന് ഭീകരരും സുരക്ഷാ സേനയും തമ്മില് വെടിവയ്പ്പുണ്ടാകുകയായിരുന്നു.
ബില്ലവാര് പോലീസ് സ്റ്റേഷന്റെ അധികാരപരിധിയിലുള്ള കോഗ് ഗ്രാമത്തില് (മണ്ഡ്ലി) നടന്ന ഏറ്റുമുട്ടലില്, പോലീസ് ഉദ്യോഗസ്ഥന് എച്ച്.സി ബഷീര് അഹമ്മദ് തന്റെ ജീവന് ബലിയര്പ്പിച്ചതായും ഒരു എഎസ്ഐക്ക് വെടിയേറ്റ് പരുക്കുണ്ടെന്നും കൂടുതല് വിശദാംശങ്ങള് കാത്തിരിക്കുന്നതായും ജമ്മു എഡിജിപി ആനന്ദ് ജയിന് ഫേസ്ബുക്കില് കുറിച്ചു.
