ടെഹ്റാന്: ഇറാന് മുന് പ്രസിഡന്റ് ഇബ്രാഹിം റെയ്സിയുടെ മരണത്തിനിടയാക്കിയ ഹെലികോപ്റ്റര് അപകടം ആസൂത്രിതമായിരുന്നുവെന്ന് സംശയിക്കുന്നതായി ഇറാനിലെ പാര്ലമെന്റ് അംഗം അഹമ്മദ് ബഖ്ഷയെഷ് ആര്ദേസ്താനി. ഹിസ്ബുള്ളയ്ക്കെതിരേ ഇസ്രയേല് നടത്തിയ പേജര്, വാക്കി ടോക്കി സ്ഫോടനങ്ങളുടെ പശ്ചാത്തലത്തിലാണ് അഹമ്മദ് ബഖ്ഷയെഷ് രംഗത്തെത്തിയത്.
ഇബ്രാഹിം റെയ്സി പേജര് ഉപയോഗിച്ചിരുന്നു. കഴിഞ്ഞ ദിവസങ്ങളില് ബെയ്റൂട്ടില് സംഭവിച്ചതുപോലെ പേജര് പൊട്ടിത്തെറിച്ചതാകാം ഹെലിക്കോപ്റ്റര് അപകടത്തിനിടയാക്കിയതെന്നാണ് ബഖ്ഷയെഷ് ആരോപണം. റെയ്സി ഉപയോഗിച്ചിരുന്ന പേജര് ഇപ്പോള് വ്യാപകമായി പൊട്ടിത്തെറിക്കപ്പെട്ടവയില്നിന്ന് വ്യത്യസ്തമായ തരത്തില്പ്പെട്ടതാകാം. എന്നാല്, ഹെലികോപ്റ്റര് അപകടത്തിനു പിന്നില് പേജര് സ്ഫോടനം ആകാനുള്ള സാധ്യത ഏറെയാണ്. ഇറാന് സൈന്യത്തിന്റെ കൂടി അറിവോടെയാണ് ഹിസ്ബുള്ളയ്ക്കുവേണ്ടി പേജറുകള് വാങ്ങിയത്. അതുകൊണ്ടുതന്നെ ഇറാന്റെ രഹസ്യാന്വേഷണ വിഭാഗം വിഷയത്തില് അന്വേഷണം നടത്തുമെന്നും അഹമ്മദ് ബഖ്ഷയെഷ് പറഞ്ഞു.
2024 മെയ് 20നാണ് ഹെലികോപ്റ്റര് അപകടത്തില് ഇബ്രാഹിം റെയ്സി കൊല്ലപ്പെട്ടത്. അസര്ബയ്ജാനുമായിച്ചേര്ന്ന അതിര്ത്തിയിലെ അറസ് നദിയിലുണ്ടാക്കിയ രണ്ട് അണക്കെട്ടുകള് ഉദ്ഘാടനംചെയ്തശേഷം വടക്കുപടിഞ്ഞാറന് ഇറാനിലെ തബ്രീസ് പട്ടണത്തിലേക്കു മടങ്ങവെയായിരുന്നു അപകടം. വിദേശകാര്യമന്ത്രി അമീര് അബ്ദുല്ലാഹിയാനും അപകടത്തില് മരിച്ചിരുന്നു. പ്രതികൂല കാലാവസ്ഥമൂലം മലയിടുക്കില് തട്ടിയതാകാം അപകടകാരണമെന്നായിരുന്നു പുറത്തുവന്ന റിപ്പോര്ട്ട്.
