ബെംഗളൂരു: കോളേജിലെ ശുചിമുറിയില് ക്യാമറ വെച്ച് പെണ്കുട്ടികളുടെ ദൃശ്യങ്ങള് പകർത്തിയെന്ന ആരോപണത്തില് ഒരു വിദ്യാർത്ഥി അറസ്റ്റിലായി. കുംബല്ഗോഡുള്ള സ്വകാര്യ എഞ്ചിനീയറിങ് കോളേജിലാണ് സംഭവം.
സ്വകാര്യ കോളേജിലെ അവസാന വര്ഷ കംപ്യൂട്ടര് സയന്സ് വിദ്യാര്ഥിയും മാഗഡിക്കടുത്ത് ചിക്കഗൊല്ലരഹട്ടിയില് താമസക്കാരനുമായ കുശാല് (21) ആണ് പിടിയിലായത്. കഴിഞ്ഞ ദിവസം ശുചിമുറിയില് വെച്ച് വിദ്യാര്ഥിനികളാണ് കാമറ കണ്ടെത്തിയത്. ഉടന് കോളേജ് മാനേജ്മെന്റിനെ വിവരമറിയിച്ചു. സോഷ്യല് മീഡിയ പ്ലാറ്റ്ഫോമുകള് വഴി ഇത് പങ്കുവെച്ചുവെന്നും ആരോപണമുണ്ട്.
സംഭവം പുറത്തുവന്നതോടെ കോളേജില് വൻ പ്രതിഷേധം അരങ്ങേറി. തുടർന്ന് പോലീസ് സ്ഥലത്തെത്തി സ്ഥിതി നിയന്ത്രണ വിധേയമാക്കുകയായിരുന്നു. കുറ്റവാളിക്കെതിരെ ശക്തമായ നടപടി സ്വീകരിക്കുമെന്ന് പോലീസ്, പ്രതിഷേധക്കാർക്ക് ഉറപ്പു നല്കിയാണ് രംഗം ശാന്തമാക്കിയത്.
ആരോപണ വിധേയനായ വിദ്യാർത്ഥി, മൊബൈല് ക്യാമറ ശുചിമുറിയില് ഒളിപ്പിച്ച് വെച്ച് എട്ടോളം വീഡിയോ ക്ലിപ്പുകള് പകർത്തിയെന്നും മറ്റ് വിദ്യാർത്ഥികളാണ് ഇത് കണ്ടെത്തിയതെന്നുമാണ് പോലീസ് പറയുന്നത്.
വിഷയം പുറത്ത് ആരെയെങ്കിലും അറിയിച്ചാല് കൊന്നുകളയുമെന്ന് ഇയാള് മറ്റ് വിദ്യാർത്ഥികളെ ഭീഷണിപ്പെടുത്തിയെന്നും ഇയാള് സ്ഥിരം കുറ്റവാളിയാണെന്നും വിദ്യാർത്ഥികള് ആരോപിക്കുന്നു. സംഭവത്തില് പോലീസ് അന്വേഷണം നടത്തുകയാണ്.
