ദുബായ് : എമിറേറ്റ്സ് എയർലൈൻസ്, മ്യൂസിയം ഓഫ് ദി ഫ്യൂച്ചർ എന്നിവർ സംയുക്തമായി സംഘടിപ്പിക്കുന്ന ഏവിയേഷൻ ഫ്യൂച്ചർ വീക്കിന്റെ പ്രഥമ പതിപ്പ് ഒക്ടോബർ 15-ന് ദുബായിൽ ആരംഭിക്കും. ദുബായ് സിവിൽ ഏവിയേഷൻ അതോറിറ്റി ചെയർമാനും, ദുബായ് എയർപോർട്ട്സ് ചെയർമാനും, എമിറേറ്റ്സ് എയർലൈൻ ആൻഡ് ഗ്രൂപ്പ് സിഇഓയുമായ ഷെയ്ഖ് അഹ്മദ് ബിൻ സയീദ് അൽ മക്തൂമാണ് ഇക്കാര്യം അറിയിച്ചത്.
ദുബായിലെ മ്യൂസിയം ഓഫ് ദി ഫ്യൂച്ചറിൽ വെച്ചാണ് ഈ പരിപാടി സംഘടിപ്പിക്കുന്നത്. ഒക്ടോബർ 15-ന് ആരംഭിക്കുന്ന ഏവിയേഷൻ ഫ്യൂച്ചർ വീക്കിന്റെ പ്രഥമ പതിപ്പ് ഒക്ടോബർ 17 വരെ നീണ്ട് നിൽക്കും.
യുഎഇ മന്ത്രിമാർ, ഉയർന്ന സർക്കാർ ഉദ്യോഗസ്ഥർ, ഏവിയേഷൻ, എയ്റോസ്പേസ് മേഖലകളിലെ പ്രമുഖർ, എയർഫ്രെയ്റ്റ്, മൈന്റെനൻസ്, ഓവർഹോൾ ആൻഡ് റിപ്പയർ, ലോജിസ്റ്റിക്സ് മേഖലകളിലെ പ്രഫഷണൽസ് തുടങ്ങിയവർ ഈ പരിപാടിയിൽ പങ്കെടുക്കുന്നതാണ്.
വ്യോമയാന മേഖലയുടെ ഭാവി എങ്ങനെയായിരിക്കുമെന്ന് നിർവചിക്കുന്ന ഒരു പരിപാടിയായിരിക്കും ഏവിയേഷൻ ഫ്യൂച്ചർ വീക്ക് എന്ന് ഷെയ്ഖ് അഹ്മദ് ബിൻ സയീദ് അൽ മക്തൂം ചൂണ്ടിക്കാട്ടി.
നേരത്തെ ദുബായിലെ മ്യൂസിയം ഓഫ് ദി ഫ്യൂച്ചറിൽ വെച്ച് സംഘടിപ്പിച്ച ഫ്യൂച്ചർ ഹീറോസ് സമ്മർ ക്യാമ്പിൽ യുഎഇ ബഹിരാകാശ സഞ്ചാരികളടക്കം നിരവധി പേർ പങ്കെടുത്തിരുന്നു. യുവാക്കളെ പ്രചോദിപ്പിക്കുകയും ഭാവി തലമുറയിൽ ബഹിരാകാശ പര്യവേഷണത്തിൽ കൂടുതൽ താൽപ്പര്യം പ്രോത്സാഹിപ്പിക്കുകയും ചെയ്യുക എന്നതായിരുന്നു ഇതിന്റെ ലക്ഷ്യം.
ബഹിരാകാശയാത്രികരുടെ അവിശ്വസനീയമായ യാത്രകളുടെയും ബഹിരാകാശ പര്യവേഷണത്തിലെ സാഹസികതകളുടെയും കഥകൾ ക്യാമ്പിൽ പങ്കെടുത്ത യുവ പങ്കാളികളെ ആവേശഭരിതരാക്കിയിരുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: